Ұлттар достығын нығайтты

Дүйсенбі, 30 Қырқүйек 2019 00:00

Түркістан облысы Полиция департаментінің ұйымдастыруымен, әртүрлі ұлт өкілдерінің достығын дәріптеу аясында, Қазақстан халқының тілдері күні мерекесіне орай «Ұлтым – өзге, тілім – бір» атты мерекелік іс-шарасы салтанатты түрде өткізілді. Оған облыстық Полиция департаментінің бастығы, полиция генерал-майоры Қайрат Дәлбековтің өзі тікелей қатысып: «20-дан астам ұлт өкілдері жұмыс жасайтын ұжымымыздағы ынтымақтастықты көрсететін бұл байқаудың алар орны ерекше. Біздің полицейлер жауапты қызметті атқара жүріп, бірін-бірі сыйлап, әр халықтың тіліне, салт-дәстүріне үлкен құрметпен қарайды. Қазақстан халқының достығы ажырамасын», – деп ізгі тілегін арнады.
Байқауға арнайы қонақ ретінде Сыбайлас жемқорлыққа қарсы іс-қимыл агенттігінің Түркістан облысы бойынша департаментінің бастығы, генерал-майор Хаким Кушкалиев келіп, «Полицейлердің тек қоғамдық қауіпсіздік пен тыныштықты сақтап қана қоймай, шын мәнінде сегіз қырлы, бір сырлы екендігіне көзі жеткендігін, мұндай қызу тартыс-ты байқау болады деп күтпегенін» – таңғалыспен атап өтті. Аталған байқауға ТО ПД-не қарасты қала, аудандық полиция бөлім/ басқармаларынан 15 команда қатысты.
Облыстық Полиция департаментінің ауласында қызылды-жасыл киінген әртүрлі ұлт өкілдері, өздерінің сән-салтанатымен көрермендердің көңілінен шықты. Атап өтер болсақ, Арыс АПБ татар, Бәйдібек АПБ күрді, Төлеби АПБ украин, Түлкібас АПБ қырғыз, Ордабасы АПБ орыс, Сайрам АПБ түрік, Қазығұрт АПБ қазақ, Созақ АПБ грузин, Кентау ҚПБ грек, Сарыағаш АПБ ұйғыр, Шардара АПБ азербайжан, Келес АПБ тәжік, Жетісай АПБ азербайжанның, яғни, өздеріне алдын ала берілген ұлттардың қыр-сырын ашуға тырысып, тартысты дода жасай білді. Әр команда өздеріне берілген ұлттың ең танымал салт-дәстүрін көрініс арқылы көрсетіп, тіл үйірер ұлттық тағамдарынан ақ дастархан жайып, қонақтарға дәм таттырды, сондай-ақ, ұлттық ән-биін сахналап, қолөнерлер шеберлері жасаған заттарынан көрме ұсынды.
Бір-бірінен асып түскен командалар арасынан жеңімпаздарды анықтау қиынға түсті. Дегенмен де, «Жүзден жүйрік, мыңнан тұлпар» атанған топтар жеңіс тұғырынан көрінді. Салтанатты шара соңында, қазылар алқасының шешімімен «Ұлтым – өзге, тілім – бір» атты байқаудың бас жүлде иегері – өнерімен ерекше көзге түскен, өзбек ұлтының сырнай-кернайларымен ән айтып, мың бұрала билеген Сарыағаш АПБ атанды. Бірінші орынды – Қазығұрт АПБ жеңімпаз болып иеленсе, екінші орынды – Ордабасы АПБ жеңіп алды. Ал, үшінші орын Мақтаарал мен Жетісай АПБ командасына бұйырды.
Барлық командалар «Алғыс хат» және бағалы сыйлықтармен марапатталды. Тілдер мерекесі – тәрбиелік мәні бар іс-шаралардың бірі. Тіл достық – көпірі екені даусыз. Ендеше, Қазақстандағы Халықтардың Тілдер мерекесі құтты болсын!

ТО ПД-нің баспасөз қызметі.

Өзінен гөрі өзгені көфп ойлайды

Сейсенбі, 24 Қырқүйек 2019 00:00

Қазақ халқында қолы ашық, жаны жомарт, өзінен гөрі өзгені ойлап тұратын, қолынан келсе жақсылық жасайтын кісілер көп. Солардың бірі – Жандарбек Қаппарұлы Жорабаев. Ол қазіргі Қазығұрт ауданында 1953-жылы 5-қарашада дүниеге келген. 1972-жылы автошколаны бітіргеннен соң, еңбек жолын сол кездегі «Коммунизм» кеңшарында жүргізуші болып бастаған. 1973-1975 жылдар аралығында Кеңес армиясы қатарында азаматтық борышын өтеген.
2000-2001 жылдарда «Батсу» жауапкершілігі шектеулі серіктестігі директорының орынбасары, «Семсер» акционерлік қоғамының аға күзетшісі, 2008-жылдан 2015-жылға дейін «Жас қанат» спорт мектебінің шаруашылық меңгерушісі қызметін атқарған. Сондай-ақ, 2008-жылы аудандық аңшылар және балықшылар қоғамының төрағасы болған. Нақ осы қызметін осы күнге дейін атқарып келеді.
Депутаттық өкілеттілігі мерзімінде Қазығұрт ауылы тұрғындарының өтініш, тілектерін тыңдап, солардың сұраныстарына сәйкес, бірқатар күрделі жұмыстар атқарып, бюджеттен ең қажетті жұмыстарға қаржы бөлуге ұдайы ықпал етіп отырған. Атап айтқанда, олардың біразы мыналар: біріншіден, ауыз су жүйесі жүргізілгенде жобаға енбей қалған көшелерді, үйлерді жобаға енгізіп, су құбырын тартуға көмек көрсеткен. Екіншіден, Қазығұрт ауылының 16 мөлтек ауданы көшелеріне электр желісін жаңарту үшін, бюджеттен 103 миллион теңге қаржы бөлуге ықпал жасаған. Үшіншіден, «Жас қанат» спорт мектебіне 25 миллион теңгеге жуық қаржы бөлінуіне, күрделі жөндеуден өткізуге септігі тиген. Төртіншіден, Қазығұрт елдімекенінің Қонаев көшесінен автотұрақ салу үшін 8,2 миллион теңге қаржы түсіріп, сонымен бірге, Тоғаев көшесін асфальттауға және оны абаттандыруға қаржы бөлуге ықпал еткен.
Жандарбек Қаппарұлы – елім, жерім деген азамат. Оның халық алдында жасаған еңбектері орасан. 1994 және 1996 жылдары екі рет Жаңаталап пен Тілектес елдімекендері жолдарына өз қаржысымен шағал төсеген. Аталмыш елдімекендердің көлік жолдарына жасаған еңбегі үшін облыстық мәслихаттың «Алғыс хатымен» марапатталған.
Сонымен қатар, «Қазақстан Республикасының тәуелсіздігіне – 25 жыл», «Қазақстан мәслихаттарына – 20 жыл» және 25 жылдық мерекелік медальдарын да омырауына таққанын, еңбегі бағаланғанын айтып өтейік.
Шын мәнінде, жасаған еңбек бағаланып отырса, ер азаматты қанаттандырады. Жандарбек Жорабаевтың еліне, жеріне сыйлайтын қамқорлығының, жақсылығының әлі көп болатынына сенімдіміз.

Сауран ӘЗІМБАЕВ.

Жаңа мектептегі жаңа кабинет

Сейсенбі, 24 Қырқүйек 2019 00:00

1-қыркүйек – Білім күні Жаңабазар ауыл округіне қарасты М.Әуезов атындағы жалпы орта мектебі жаңадан салынған білім ордасына көшіп, үлкен қуанышқа кенелген болатын.
Еңселі де жарық, сәулетті де келбетті мектеп заманауи оқу құралдарымен, қатты және жұмсақ жиһаздармен толық жабдықталып, ұстаздар үшін де, оқушылар үшін де ыңғайлы жағдай жасалған. Анандайдан менмұндалап тұратын жаңа мектептің сәулетіне ауыл тұрғындары да таңырқай қарап, іштей бойларын қуаныш сезімі билейді. Сондықтан, ауыл тұрғындары мектепке қызығып та, қызғанып та қарап қоймай, өздері мектеп дирекциясына ұсыныстарын жеткізіп, әрбір сыныпқа еңбегімен елге танылған азаматтардың есімімен кабинет жабдықтауға өтініштер жасаған. Солардың бірі өмірден өткен Амандық Төлтебаевтың ұрпақтары мен туыстары болатын. Олардың мұндай ұсыныс жасауға өзіндік жөні де бар еді.
Амандық атаның жұбайы Жаңылай Құлмағанбетқызы осы мектепте еңбек жолын бастап, қаншама шәкірт тәрбиелеген ұлағатты ұстаз болған.
Тағдырдың қосуымен 1958-жылы Амандық пен Жаңылай екеуі отау құрады. Жаңылай Ташкенттегі Низами атындағы пединститутының студенті болатын. Тұрмысқа шыққан Жаңылай оқуын сыртқы бөлімге ауыстырып, кейіннен оқуын бітіреді. Сөйтіп, үйінің жанындағы М.Әуезов атындағы мектебіне (бұрын М.Горький атындағы) мұғалім болып жұмысқа орналасады. Содан өмірінің соңына дейін оқушыларға математика пәнінен сабақ береді. Өз пәніне деген жауапкершілігімен оқушылардың осы пәнге деген құштарлығын аша білетін. Ұжымда беделді, ағайын-туыс, дос-жарандар арасында абыройлы еді.
Қазіргі таңда Амандық атамыз да, Жаңылай апайымыз да өмірден озған. Бірақ, өмірін жалғастыратын артында ұрпақтары қалды. Балалары Бейбіт пен Бақтияр аналарының жолын қуып, ұстаз болуды қаласа, Бейбіт, Мұхтар, Бауыржан – өз кәсібін ашқан білікті кәсіпкерлер. Бәрі де үйлі-жайлы. Төрт қызы да тұрмыс құрып, бүгінде немере сүйіп отырған ардақты аналар.
Ұрпақтарының армандары асыл. Өмірге әкелген әке мен анасының атына кір келтірмеу әрқашан рухтарына бас иіп, тағзым ету.
Осы бағытта ұрпақтары бірқатар игілікті істердің ұйытқысы да бола білген. Әкесі мен аналарының өмір жолдары жайлы деректі кітап жазып, көпшілікке ұсынған. «Өмір өзен» деген атпен басылған кітап, бұл күнде әріптестерінің сүйіп оқитын кітабына айналған.
Таяуда Жаңылай апайдың ұрпақтары тағы да игі істің бастамасын жасады. Жаңадан салынып, пайдалануға берілген М.Әуезов атындағы жалпы орта мектебінің бір сыныбын анасы Жаңылай Құлмағанбетқызы атындағы математика кабинетін ашып, бүгінгі заман талабына сәйкес жабдықтап, мектеп ұжымына табыс етті.
Осы кабинеттің ашылуына орай арнайы жиын болды. Оған мектеп ұжымы, Жаңылай апайдың бірге қызметтес болған әріптестері мен шәкірттері қатысты.
Жаңылай Құлмағанбетқызының шәкірті М.Әуезов атындағы жалпы орта мектебінің түлегі, М.Әуезов атындағы Мемлекеттік университетінің профессоры Саттар Досалыұлы Өмірзақов өз ұстазы жайлы мәнді де мағыналы естеліктерімен бөлісті.
Бірге қызметтес болған ұлағатты ұстаздар Ордан Айтуов, Ұлан Байназарова, Мария Алимбетова, Азиза Рысбаева Жаңылай апайдың еңбектегі, отбасындағы игі жетістіктерін, жоғары адамгершілік және ұстазға тән қасиеттерін еске алды.

Ж.БЕКОВ,
Жаңабазар ауылы.

 

Еліміз тәуелсіздік алғаннан бастап, «Қазақстан Республикасы өзін демократиялық, зайырлы құқықты және әлеуметтік мемлекет» деп Ата заңымызды белгілеп, даму бағыты айқындалған, жарқын болашаққа қарай батыл қадам басқан мемлекет болып қалыптасып келеді.

Білімділік, біліктілік, жоғары моральдық-этикалық бейне, адамгершілік – әрбір мемлекеттік қызметшінің бойында үйлескен жағдайда – мемлекеттік қызметшінің «жоғары имиджі» жасалады, осындай имидж мемлекеттік қызметтің беделін көтеруге тікелей жол болып табылады. Мемлекеттік қызметшінің жағымды имиджіне қойылатын негізгі ережелер Қазақстан Республикасының Ар-намыс Кодексінде анықталған, онда былай деп белгіленген: «Мемлекеттік қызмет атқару қоғам мен мемлекет тарапынан ерекше сенім білдіру болып табылады және мемлекеттік қызметшілердің адамгершілігіне және моральдық-этикалық бейнесіне жоғары талаптар қояды».

Мемлекеттік қызметтің имиджі мемлекеттік органдармен халыққа көрсетілген қызметтің сапасына байланысты. Мемлекеттік қызметтің оң имиджін қалыптастыру шеңберінде:

Сыбайлас жемқорлыққа қарсы заңнаманы одан ары жетілдіру мен сыбайлас жемқорлыққа қарсы бағыттылықта мемлекеттік қызметшілердің мінез-құлқының этикалық нормаларын нығайту;
Көпшілік санасында кәсібилік, адалдық, ашықтық, сыпайылық және құзыреттілік ұғымдарына негізделетін мемлекеттік қызметтің оң имиджін қалыптастыру. Осы мақсатта аудандық дене шынықтыру және спорт бөлімінің қызметкерлері әділдік пен туралықтан айнымай халық пен мемлекет алдында қызметтерін адал атқаруда.

Мемлекеттік қызметкердің жағымды имиджін қалыптастыру және нығайту барысында әрбір мемлекеттік қызметші өз қызметінің барлық жауапкершілігін толықтай сезініп, қызмет амалдарын жетік меңгеріп, сол саланың білікті маманы болуы қажет.

Б.ОРЫНБАСАР,

аудандық дене шынықтыру

және спорт бөлімінің бас маманы.

 

БАЛА ТӘРБИЕСІ – МАҢЫЗДЫ ІС

Жұма, 14 Маусым 2019 00:00

 

Ата-ана үшін өз баласының өмір жолында дұрыс тәлім-тәрбиемен қалыптасуынан асқан маңызды нәрсе жоқ. Өйткені, тәлім-тәрбиенің дұрыс қалыптасуы – адам тағдырын шешетін ұлы іс. Бұл ұлы істің бастау алар қайнар көзі – ең бірінші кезекте отбасы болып саналады. «Бала тәрбиесі – бесіктен» дегендей, баланың бойындағы жақсы, ізгі қасиеттердің берік қалыптасуына отбасындағы ата-ананың берген тағылымы мен үлгі-өнегесінің орыны өте айрықша.

Ғасырлар бойғы тәжірибесінен даналық жолды жинай білген халық: «Ұяда не көрсең, ұшқанда соны ілерсің» деп түйген. Егерде, бала отбасында жақсы тәлім-тәрбие алса, өскенде соның ізімен, жолымен жүретіні анық. Отбасындағы барлық адамдардың іс-әрекеті баланың қалыптасуына өзіндік іздерін қалдырады. Сондықтан да отбасында балаға тәрбиені қоғамдық ортаға байланыстыра отырып берген ата-ана ғана ұтады.

Екінші кезекте балабақшадағы тәлім тәрбиенің жүйелі түрде жүргізілуі де өзінің оң ықпал әсерін тигізетініне еш шүбә жоқ. Жас бүлдіршін балабақшаға барғанда өзі қатарлы балалармен ойнайды, араласады. Әр түрлі тәрбие алған балаларды көреді, аралас ортаға түседі. Айтқанды істемейтін және тіл алғыш, жылауық және сабырлы балаларды салыстыра қарайды. Олардың әр түрлілігіне мән беріп, жақсы жағына мойын бұрады. Бұл арада жалпыға ортақ – адамгершілік тәрбиесі беріледі. Ол тәрбиешінің қатысуымен жүзеге асады.

Дұрыс тәлім-тәрбиенің ең түпкі тамыры – өзінің туған халқын, ұлтын шынайы сүюден, қадірлеуден бастау алады. Бұл сара жолда ұлттық салт-дәстүрлерді жандандырып, әдет-ғұрыптарымызды дамытып, ұлтаралық достық қарым-қатынастарды нығайтуға жол ашып, балаға оларды саналы түрде үйреткен абзал. Мектептегі сабақ та, тәрбие де осы бағытқа қарай икемделсе ғана баланы дұрыс ортаға бейімдей аламыз. Сонда ғана оның бойындағы адамгершілік қасиет жоғары дәрежеде, ең керекті үлгі-өнегеге сай қалыптасады деп еш шүбәсіз сеніммен қараған болар едік. Ашығын айтқан жөн, ең алғаш баланы адамды бағалауға, қадірлеуге, сый-құрметпен қарауға тәрбиелеуіміз қажет.

Халқымыздың даналығында «Баланы жастан» деген сөз бар. Сондықтан тәрбиенің тал бесіктен басталатынын ескерсек, ата-бабадан келе жатқан ибалық пен инабаттылықты өзіміз түпкілікті түсініп, балаларымызға сол тәрбиенің нәрін сіңіре білсек, бұл қазіргі заманда бала тәрбиесіне қосқан біздің қомақты үлесіміз болып табылар еді. Еліміз егемендік алып, өз мәртебесі биіктей түскен шақта ең алғашқы алға қояр міндеттің бірі – егеменді еліміздің болашағын жалғастырушы ұрпақ тәрбиелеу. Ал сол жас ұрпаққа тәрбие беретін бүгінгі тәрбиеші – мамандар тәрбиелеу мен білім берудің жаңаша жетілдірілген әдіс-тәсілдерін іздестіріп, күнделікті жұмыс барысында жаңашыл бағыттар қарастырып, оны өздерінің іс-тәжірбиесінде қолданып отырса, бала тәрбиесі алға басары сөзсіз. Бұл ойдың тармағы бүгінгі тәрбиешінің кәсіптік шеберлігінде, шығармашылық дамуына әкеліп соғады.

Қазір мектеп жасына дейінгі балалар бірыңғай тыңдаушы ғана емес, оқырман да. Мектеп жасына дейінгі балалардың бойында оқу қызметін меңгерту басты бағыты болып саналады. Ересек адам мектепке дейінгі балаға күшті әсер етеді, ол өзара әрекет үрдісінде кешенді әдістер мен тәсілдердің көмегімен танымдық белсенділікті қалыптастыруға, балалардың психикалық ойлау, қабылдау, ес, зейін, сөйлеуді, өзіне сенімділікті және ынталықты дамыта отырып, олардың белсенді танымдық іс-әрекетпен шығармашылыққа бой алуына көмектеседі. Ұстаздық тәжірибемізде біз осының бәрін басшылыққа алып отырамыз.

Тағы айта кететін мәселе, кітап оқу. Осыны мұғалім ғана емес, ата-анада перзентінің санасына үнемі құйып отыру керек. Мектеп қабырғасында көркем әдебиеттерді оқуға дағдыланған жеткіншектің бойында жылдар өте зиялылықтың қалыптасатыны белгілі. Жастайынан кітап оқуға дағдыланған бала студенттік шағында да, онан кейін де өмір бойы өз саласына қатысты әдебиеттерді оқып, ізденіп жүретіні сөзсіз. Сондықтан, осыған қазірден мән берген абзал.

Айгүл ОМАРОВА,

қазақ тілі мен әдебиеті пәні мұғалімі.

Орман – біздің байлығымыз!

  

      

       «Сайрам-Өгем» МҰТП-нің «Өгем» филиалына қарасты Өгем орманшылығының солтүстігінде орналасқан ұлы жұрт, Кіші жұрт Шағыртас, Құмкезең тауларында қызыл кітапқа енген Мензбир суыры мекендейді. Мензбир суыры – қазіргі таңда өте сирек кездесетін жануарлардың бірі. Оны қорғау, қамқорлық көрсету – ұлттық парктің мемлекеттік инспекторларының міндеті. Өйткені, көктем айларында ұйқыға кеткен жан-жануарлар оянып, жабайы аң-құстар, балықтар жаппай балалап, тұқым басып, уылдырық шашып көбейетін кезең. Міне, осы кезеңде жабайы аң-құстардың да жаулары көбейе түседі. Қазір кім көрінген аңшы, олардың ауылда да, қалада да көбейгендігі рас. Кейбір қандастарымыз кішкене дүние бітіп шыр байланса болды, бәрі қолына қымбат-қымбат мылтық ұстап, аңшы болып шыға келетінді шығарды.

       Аңшы болғанда қандай? Қорықшылардың тілімен айтқанда, браконьер, қазақшалағанда, баукесер, сұғанақ. Олай демей, не дерсің? Егер олардың аң атқанда құмарына бір кіріп алса болды, еш тоқтамайды, көзіне көрінгендерін қыра береді. Өйткені, байырғы аңшылардай ішіп-жеуге емес, бұлар көрсе қызарлықпен ермекке атады ғой, ауылдағысы да сол, қаладағысы да сол. Мұндай сұғанақтықты тоқтатайық, қайта осы аң-құстарды бірлесіп қорғайық, жанашырлық танытайық, келешек ұрпаққа қалдыруды ойланайық.

     Құрметті аудан тұрғындары мен ұжым, төрағалары мамыр айынан бастап тау жайылымына жеке немесе ұжым малдарын жайылымға шығарсаңыздар, сол кездерде көптеген қателіктерге жол беріліп жатады. Ол қателіктерге жол бермеу үшін біріншіден орман билетін алмай тұрып мына төмендегі тиісті заңға сәйкес керек құжаттарды, Өгем филиалының кеңсесіне алып баруды ұмытпаңыздар.

  1. Барлық мал басына ветеринарлық анықтама.
  2. Ауыл әкімдігінен қанша малы барлығы туралы анықтама.
  3. Ертіп жүрген иттердің мойындарында қарғысы болу керек және әрбір иттің толтырылған паспорты жеке-жеке болуы тиіс, онсыз сіздерге орман билеті берілмейтінін ескертеміз.

   Жоғарыдағы құжаттарсыз жайылымға рұқсатсыз шығып кеткен жағдайда әкімшілік шара көріледі. Заң бұзушылыққа шара көру қатаң тәртіпте жүргізіледі.

   Аудан көлеміндегі орман қоры жерінде және ашық алаңқай жерлер мен егіндік алқаптарда, шабындықтарда, жол бойларында адамдардың жанашырлығы жоқтығы салдарынан күн ыстық мезгілдерде өрт шалу көбейіп кетті. Себебі, адамдардың табиғатқа деген сүйіспеншілігінің немесе санасының төмендігі болса керек. Сол үшін естеріңізде сақтаңыздар! Орман, жер, ағаш, шөп – халықтың байлығы, ол тыныс алатын ауасы, өміріміздің дәнекері, жасыл желексіз адамзатқа өмір жоқ. Өрттен табиғат байлығын қорғау, жер бетіндегі барлық есі бар азаматтардың тікелей міндеті мен борышы екенін ұмытпаңыздар.

Бақжан СМАНОВ,

«Сайрам-Өгем» мемлекеттік ұлттық табиғи паркі

«Өгем» филиалының аңшы-биолог инженері.

Елдің еңсесі биік, іргесі бекем, бірлігі бүтін болуы – ҚР азаматтарының еселі еңбегінің жемісі, қалтқысыз атқарған қызметінің көрінісі. Мемлекетіміздің межелі жетістікке жетуі, ең алдымен мемлекеттік аппараттың кәсібилігіне тікелей байланысты. Мемлекеттік қызмет – билік пен халық арасын жалғайтын алтын көпір болғандықтан, қоғамда мемлекеттік қызметкерлерге қойылатын талап жоғары. Өз сөзінде Елбасымыз Нұрсұлтан Назарбаев: «Мемлекеттік қызметші – жоғары моральды жауапкершілік, кәсіби білімін тәжірибеде қолдана алу, адалдық, таза ниеттілік, белсенді өмірлік ұстаным сияқты негізгі қасиеттерге ие болуы шарт, яғни, мемлекеттік қызметтегі әр адам өз жұмысының маңыздылығын сезіне отырып, өз елінің патриоты болуы тиіс», – деп мемлекеттік қызметтің қоғам алдындағы құнын елеп-екшеп көрсеткен еді.
Қазіргі таңда, ҚР Мемлекеттік қызметі біліктілік деңгейін жоғары сатыға көтеру үшін, лауазымды қызметкерлердің қабілетін бағалау мен арттырудың озық үлгісін іске қосты. Бұдан былай, ел мүддесі үшін есепсіз еңбек еткен мемлекеттік қызметкерлерге лайықты еңбекақы берілетін болады. Бұл игі бастама ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Төрағасы Алик Шпекбаевтың ұсынысымен жүзеге асып отыр. Енді, мемлекеттік қызметшілер мерекелік сыйақыдан бас тартып, жылдық жұмысының нәтижесі арқылы жоғары жалақы мен бонустарға иелік ететін болады. Бұл мемлекеттік қызметкерлердің табыс көзін арттырып қана қоймай, мемлекет аппаратын басқаруға деген бәсекелестікті туғызуға сеп болары анық. Ал, бәсеке жүрген жерде сан емес, сапа жүретіні белгілі.
Мен ең алғаш қызмет жолымды 2004-жылы Ақтау горнизонының әскери сотында бас маман ретінде бастап, 2007-жылы Шардара ауданының Әділет басқармасында жетекші маман ретінде қызмет еттім. 2015-жылы ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ОҚО бойынша департаментінің консультанты болсам, бүгінде Түркістан облысы бойынша Департаментінің мемлекеттік қызмет саласындағы бақылау басқармасының бас маманы болып қызмет етудемін. 15 жылдық еңбегім осы бастама арқылы оң бағаланып, мен де қызметімнің нәтижесіне сәйкес жоғары бонус мөлшерін алдым. Берілген бонус есебінен өзімнің әлеуметтік-тұрмыстық жағдайымды жақсартып, отбасымның қажеттілігін өтеуге мүмкіндік алып отырмын. Алдағы уақытта жоғары жалақы мен бонустардан келіп түскен қаражатты 6 ұл-қызымның біліктілік деңгейін арттыруға бағыттап, жеке даму курстарына арнасам деймін.
Сондай-ақ, ата-анамның тұрғын үйіне жөндеу жұмыстарын жүргізіп, игі істің басы-қасында болуға ниеттімін. Бұл қуаныш менің шаңырағымда ғана емес, мемлекеттік қызметтегі әр азаматтың үйінде орын алып жатқандығы көпке мәлім. Сайып келгенде, мұндай мүмкіндікті тарту еткен Агенттік Төрағасы Алик Шпекбаевқа мемлекеттік қызметкерлер тарапынан өз алғысымды білдіремін. Әрі қарай да ілкімді істеріммен ілгері жылжып, халқыма қалтқысыз қызмет ете бермекпін.

Нұрлан АМАНДЫҚ.

ҮШ БИДІҢ ЕСКЕРТКІШІ ОРНАТЫЛДЫ

Дүйсенбі, 06 Мамыр 2019 00:00

Қазығұрт ауданындағы «Бабалар рухына тағзым» кешенінде қазақтың үш биінің еңселі ескерткіші ашылды. Шарапхана ауылында өткен салтанатты шараға облыс әкімі Өмірзақ Шөкеев пен ҚР Мемлекеттік сыйлығының игері Асанәлі Әшімов, ҚР Парламенті Мәжілісінің депутаты Сауытбек Әбдірахманов пен мемлекет және қоғам қайраткері Қуаныш Айтаханов сынды азаматтар қатысты.

Аудан әкімдігінің мәжіліс залында Қазығұрт аудандық мәслихатының алтыншы шақырылымындағы кезектен тыс қырық үшінші сессиясы өтті. Сессияға аудан әкімі Т.Телғараев, аудан әкімінің орынбасарлары, бөлім басшылары, ауыл әкімдері, кірістер басқармасы басшысы, аудандық аумақтық сайлау комиссиясының төрағасы және бұқаралық ақпарат құралдарының өкілдері қатысты.

Алматыда орналасқан, кәсіпкер Марғұлан Сейсенбай басшылық ететін «Nomad Explorer» ұйымдастырып отырған экспедиция алғаш – Ұлытауда, екінші – Маңғыстауда, үшінші – өткен жылы бір аптадай уақыт Алтайда болыпты. Биылғы төртінші – Түркістан және Жамбыл облыстарының қасиетті орындарымен танысу мақсатын көздеген «Оңтүстік аңыздары» экспедициясы 600 саяхатшыны, 100 қызметкерді, бас-аяғы 700-ден аса адамды қамтыған алғашқы саяхаты қасиетті Қазығұрт тауынан бастау алды. Оларды Қазығұрт ауданы әкімінің орынбасары Тайбек Қалымбетов, аудандық ішкі саясат бөлімінің басшысы Абай Серкебаев, кәсіпкерлік бөлімінің басшысы Аян Көшкінбай, Қ.Әбдәлиев ауылдық округінің әкімі Оразалы­ Қазыбаев, өлкетанушы-таныстырушы Райымбек Айтубай және тағы басқалар қарсы алды.