Орыс тілі апталығы өтті

Дүйсенбі, 03 Ақпан 2020 00:00

 

Жуырда Қ. Өмірәлиев атындағы жалпы білім беретін орта мектебінің орыс тілі мен әдебиеті бірлестігінің ұйымдастыруымен "Владеть русским языком, значить владеть второй душой" тақырыбында орыс тілі апталығы өтті.

Апталық мектеп қабырғасын безендіруден басталды. Салтанатты жиынның ашылуын мектеп директоры О.Салыбаев ашып берсе, апталықтың жоспарымен бірлестік жетекшісі Мақұлбай Мұрат таныстырды. Орыс тілі мен әдебиетіне деген қызығушылықты арттыру мақсатында 5-11 сыныптарға «Абай және Пушкин» атты әдеби сазды кеш өткізілді. Шәкірттеріміз бен ұстаздар орыс халқының әдеп ғұрыптарын сахналап, орыс халқының билерін биледі. Мұнан өзге «Звездный час» ойынын жоғары деңгейде көрсете білді.

Апта бойы  бастауыш сынып оқушылары үшін орыс ертегілеріне байланысты көркем сурет сайысы, «Қыс» мезгіліне байланысты мәнерлеп оқу сайысы өтті.          Апталықтың соңғы күні мерекелік қорытынды жиын өтті. Пән мұғалімдері сыныптарға жоспарлы ашық сабақтар өтіп, өте жақсы деген бағаға ие болды. Осынау апталықта жақсы білімімен, өнерімен, алғырлылығымен көзген түскен 10- сынып оқушылары Шалқарбай Лашын мен Ералхан Динара, 7-сыныптан Сапарбек Сабина, 5-сыныптан Ошақбай Мардан, ал 6-сыныптан Әлімқұл Нұрсәт, Тоқтабай Ұлмекенге мектепішілік марапаттаулар табыс етілді.

Осынау апталықтың жоғарғы деңгейде өтуіне атсалысқан орыс тілі мен әдебиеті пәнінің ұстаздары Жанар Жунисова, Тоғжан Тулешева, Нұржамал Мұханова т.б апайларға мектеп директоры Оралбек Салыбаев алғыс білдірді.

         «Өзге тілдің бәрін біл, өз тіліңді құрметте», – демекші оқушыларымыз апталыққа бар ынтасымен қатысып, тіл – достықтың кепілі екендігін аңғартқандай болды.

Жанар ЖУНИСОВА,

Қ.Өмірәлиев атындағы жалпы

білім беретін орта мектебінің орыс тілі

мен әдебиеті пәнінің мұғалімі.

Көп тілді білу – заман талабы

Дүйсенбі, 03 Ақпан 2020 00:00

Семинар

 

        Жуырда М.Өтемісұлы атындағы жалпы орта білім беретін мектебінде «Көп тілді білу – заман талабы» атты аудандық семинар өтті.

       Оған ауданымыздағы білім ошағынан 40-қа жуық мұғалім қатысты. Аталмыш шараға қатысушыларды мектеп директорының оқу ісі жөніндегі орынбасары Үрлайім Абубакирова мен мектеп директорының тәрбие жөніндегі орынбасары Берік Каюпов, ұстаздарымыз Жанна Қадірова мен Оразкүл Кұдайбергенова мектептің тыныс-тіршілігімен таныстырды.

      Басқосуды мектеп директоры Манзура Тұрғымбаева, аудандық білім бөлімінің әдіскері Гүлсара Құралбаева ашып, алдағы уақыттағы атқарылар жоспарларымен бөлісті.

   Семинарда мектебіміздің мұражай жетекшісі Балнұр Айтжан келген қонақтарға «Күн шуағы» тренингін өткізсе, мектебіміздегі музыка пәнінің мұғалімі Биназаров Мұхтар ағайымыз концерттік бағдарлама қойып, көтеріңкі көңіл-күй сыйлай білді.

     Жоспар бойынша ағылшын тілі пән мұғалімдері ашық сабақтар өтті. Ж.Жақсылықова 3 «а» сыныпқа «Around the house» тақырыбында, ал, 1 «а» сынып оқушыларына Жайнагүл Абдалиева «My pets» тақырыбында ашық сабақ өтті.

   Биология пәнінің мұғалімі Гүлнар Құлымбетова сабаққа енген мұғалімдерге сабақтың тақырыбына сай жануарларды таңдау арқылы өздерінің мінездерін танитындықтары жайлы мінез-құлқы тренинг өткізді.

Сабақтардан шығып, мектебіміздің тренері, математика пәнінің мұғалімі Оразкүл Жүнісбекованың «Сыни тұрғыда ашық сұрақтар қою» тақырыбында ұйымдастырылған коучинг сабағына қатыстық. Семинар соңы тәлімгеріміз Меруерт Сақтағанова және музыка пән мұғалімі Мұхтар Биназаровтың ұйымдастыруымен оқушылар «I love English» атты кеш өткізді.

Семинар соңында ұстаздар ұсыныс, пікір білдіріп, баға берді. Мұғалімдер аудандық білім бөлімінің «Алғыс хаттарымен» марапатталды.

                                                 Жанат   ЖАҚСЫЛЫҚОВА,

                                          М.Өтемісұлы атындағы жалпы орта білім

                                       беретін мектебінің ағылшын тілі пінінің мұғалімі.

ҚҰРАЛБЕКТІҢ ҚАЗЫНАЛЫ КІТАПТАРЫ

Сейсенбі, 14 Қаңтар 2020 00:00

Тұсаукесер

 

Жуырда Қазығұрт ауданындағы орталық мұражайда ҚР Журналистер одағының мүшесі, аудандық «Қазығұрт тынысы» газетінің тілшісі, қазақ тілі мен әдебиеті мамандығы бойынша педагогика ғылымдарының магистрі, жазушы-шежіреші Құралбек Ергөбековтің «Түркістан облысы әулие-әмбиелері», «Харзиян шаһары һәм Ысмайыл ата» және «Теңдесі жоқ есім һәм Нұрнама» атты кітаптарының тұсаукесеріне арналған «Киелі Қазығұрт қаламгері» атты шығармашылық кеші өтті. Оны мұражай директоры Оралбек Тәжиев жүргізді. Аудан әкімдігі атынан Сапар Қалботаев, ардагерлер Құттыбек Жұмашев, Өмірзақ Мұстафаев, өлкетанушылар Кәрім Аппазов, Мұратқожа Исмаилов, тарихшы ұстаздар Айжан Шүменбай, Гүлжамал Бейсенбаева, әнші-сазгер Аян Қожанов, балалар кітапханасының меңгерушісі Айгүл Тасполтаева, жастар атынан Айбек Молдасапаров жерлесіміздің мол қазына жинақталған еңбектері туралы сөз етіп, оң жағынан бағалап, шығармашылық табыс тіледі.

Құралбек Жолдасұлы тұсауы кесілген кітаптары жайында: «Түркістан облысы әулие-әмбиелері» кітабы негізінен 2018-жылы тоқсан жылдығын атап өткен Сайрам, Бәйдібек, Созақ, Түлкібас, Қазығұрт сияқты аудандардағы қасиетті орындарды паш етсе, «Харзиян шаһары һәм Ысмайыл ата» кітабы Қазығұрт ауданының Тұрбат ауылы округіндегі ертеректе болған үш қалашық орны мен сол өңірдегі ұлық әзіз әулиелерге, ал, «Теңдесі жоқ есім һәм Нұрнама» кітабы Алланың 99 көркем есімі мен басқа да көптеген ұлық теңдесі жоқ теңеулеріне арналған. Нұрнаманың асылы мәтіні мен дұға-тілегі тұңғыш рет араб әрпінде теріліп транскрипцияланды, кирилше оқылуымен және қазақшасымен беріліп отыр», – деді.

Жиын соңында Қ.Жұмашев қаламгерге «Киелі Қазығұрт» қорының төрағасы Байдулла Қонысбек пен атқарушы директоры Жарқынбек Төлтебай қол қойған «Қазығұрт – Алтын қазық» төсбелгісін табыс етті. Әріптесіміз өзінің алдағы жоспарлары жайында жиынға қатысушылармен ой бөлісті.

Жорабек СҮЙЕУБЕКОВ.

«Достық айнасы – шынайылық»

Сейсенбі, 05 Қараша 2019 00:00

Өзін-өзі тану

                           

Жуырда Ө.Жамалов атындағы жалпы білім беретін жалпы орта мектебінде 8 «ә» сынып оқушыларымен «Достық айнасы» атты өзін-өзі тану мұғалімінің ұйымдастыруымен ашық сабақ өтті. Еркін форматта өткен ашық сабаққа пән мұғалімдері мен сынып жетекшілер, оқу ісі және тәрбие ісі жөніндегі орынбасарлары мен әлеуметтік педагогтар, психологтар қатысты.

Өзін-өзі тану сабағында алған әсерлерімен бөліскен оқушылар ойларын ашық та, айқын етіп жеткізе білді. Ең алдымен өзін-өзі тану бойынша 5 құндылыққа тоқталып өттік. Олар: дұрыс әрекет, қиянат жасамау, сүйіспеншілік, ішкі тыныштық, ақиқат. Осы бес құндылық жайлы оқушыларға бейнероликтер мен «Достық» тақырыбында слайдттар көрсетілді.

Ал, Смайлов Қалдарбек, Бейсебай Нурзия, Сарманова Анапия, Исақова Назира есімді ұстаздарымыз балалармен бірге мақал-мәтел жарысында бірлесе тапсырмалар орындауға атсалысты. Шәкірттердің ой-өрісін дамыту мақсатында арнайы құрастырма жұмыстары мен сөзжұмбақтар да, ребустар да достық нышанын айқындап тұрды.

Достар, бері келіңдер,

Қолдарыңды беріңдер.

Шаттық толы шеңберге,

Қуанышпен еніңдер!, – деп екі топқа бөлініп шаттық шеңберінде адам бойындағы жақсы-жаман қасиеттерге тоқталып өттік.

 

Базаркүл БЕКЕНБАЕВА,

Ө.Жамалов атындағы жалпы

орта мектебінің өзін-өзі

тану пәнінің мұғалімі.

ТІЛ БІЛГІРЛЕРІ АТАНДЫ

Дүйсенбі, 30 Қырқүйек 2019 00:00

Қазақстан халқының тілдері күні мерекесіне орай, 16-қыркүйек пен 21-қыркүйек аралығында «Қаржан» жалпы орта білім беретін мектебінде «Тіл – халық пен мәдениеттің жарық жұлдызы» атты қазақ тілі апталығы өтті. Жоспарға сай, әр күні түрлі іс-шаралар орын алды. Апталықтың төртінші күні 8 «а», «ә» және «б» сыныптары аралығында «Тіл білгірі» атты сайыс өткізілді. Оған әр сыныптан 4 оқушыдан қатысты. Әрбір топ өз аттарын қорғап, ұрандарымен, топ мүшелерімен таныстырды.
Сайыс 5 шарттан тұрды. Әр шарт бойынша қазылар алқасы ұпай сандарын қойып, топтарды бағалап отырды. Өте тартысты әрі қызықты өткен сайыстың нәтижесі бойынша 8 «б» сынып оқушыларынан құралған «Білгірлер» тобы үздік деп танылып, бірінші орынға ие болды. Асхат Қанат, Альбина Сейтханова, Ақгүлім Жандарбек, Қарлығаш Орынбаева өздерінің білімді екендіктерін көрсете білді. Сайыс соңында әр топ мақтау қағаздарымен марапатталды.

Жандаулет СҰЛТАНБАЙ.

11 миллионыншы Мұхтармектепке келді

Дүйсенбі, 16 Қырқүйек 2019 00:00

 

Қазақ халқы үшін әрбір шаңырақтың сәулелі шырағы – сәбидің дүниеге келуі. Ол – отбасына қонған бағы. Артында қызы қалғаны – ісі қалғаны, ұлы қалғаны – өзі қалғаны деп түсінеді қазақ халқы. Отбасындағы ұлды ұрпағым деп қадірлей білген. Дүниеге ұл келсе, ұрпақ жалғасы санаған. Ал, тегінің жалғасы бақ-құт әкелер он бір милионыншы сәбидің дүниеге қатар келуі бақ үстіне бақ емес пе?! Міне, сол он бір миллионыншы Мұхтар Абдрахым жаңа оқу жылыныңалғашқы қоңырауы соғылғанда мектеп табалдырығын аттады. Қ.Өмірәлиев атындағы жалпы орта мектебіне 1-сыныпқа қабылданды.

Талапты бала, талпынған құстай, Құмары қанбас биікке ұшпай, – демекші, Мұхтардың болашағынан үлкен үміт күтетін азамат екенін байқадық. Салтанатты жиында Мұхтар мектеп түлектеріне ізгі тілегін жыр-шумақтарымен жеткізе білді.

   2012-жылдың 28-желтоқсанында 11 миллионыншы болып туған қазақ Мұхтар Абдрахым Қазығұрт ауданы, Үшбұлақ елді мекенінде дүниеге келді. Бұл атаулы қуанышты ел ағалары елеусіз қалдырмай, жөн-жоралғысын жасап, құттықтап ізгі тілектерін айтқан-ды. Бұл қуаныш Үшбұлақ елдімекенінің тұрғындары үшін   керемет жағымды жаңалықтың бірі болған.

Мұхтардың ата-анасы жақсы тұрады. Осы отбасының өмірі   елге үлгі боларлықтай. Мұхтар – отбасында төртінші перзент. Анасы Шолпан Бақытжанқызы ағылшын тілі пәнінің мұғалімі, көптеген шәкірттерді тәрбиелеп, білім нәрін себе білген ұстаз. Қазір «Күншуақ» бала бақшасының меңгерушісі. Әкесі Мәлік Абдрахымұлы Бадамбаев ауыл шаруашылығы саласында.

Мұхтарға да, өзге де шәкірттерге айтарымыз, қадамдарына гүл бітсін! Тәрбиелі де тәртіпті, ақылды да өнегелі, рухани адамгершілігі мол, Қазақстанның беделді азаматы болыңдар деп тілейміз!


Ақмарал ЖАМАЛОВА,

Қ.Өмірәлиев атындағы орта мектептің қазақ тілі мен әдебиеті пәнінің мұғалімі.

Алтын ұя

 

Заңғар жазушымыз М.Әуезов «Адаммен адамды, халықпен халықты теңестіретін – білім» деген-ді. Сондай білім ордаларының бірі – аудан орталығындағы Түркістан облыстық білім басқармасына қарасты №11 санаторий типтес арнаулы мектеп-интернатына 55 жыл толып отыр. Бұл мекеме 1963-жылы салынып, 1964-жылы ақпан айында ашылған еді. Яғни, алғашқы түлектері ретінде 1964-жылы 12 оқушы бітіріп шықты. Алғашқы директоры соғыс және еңбек ардагері Әбден Төлепов болды. Ол 1964-жылдан 1981-жылға дейін басқарды. 1981-1985 жылдар аралығында Пердеш Қыдырбаев, 1985-1990 жылдар аралығында Файзулла Асқаров, 1990-1991 жылдары Адам Клинк, 1991-2016 жылдар аралығында Қабылбеков Болат директор болса, 2016-жылдан бері Айгүл Юсупова басқаруда.

Облыс көлемі бойынша 350 оқушы биылғы оқу жылында тәрбиеленіп, білім алып, сауықтырылып шықты. Әрине, көкірегімізді оятып, сауатымызды, көзімізді ашатын білім ошағында осынау 55 жыл бойы қаншама ұстаздар қызмет істеп, өзіндік еңбек үлестерін қосып, білім нәрімен сусындатып, ұстаздықтың ыстығына күйіп, суығына тоңып, қаншама түлектерді ұшырды. Міне, бүгін елу алтыншы түлектерін қанат қақтырды. Тоғыз жыл бойы тәрбие мен білім нәрін бойына құйып, ұстаздарына анасындай еркелеп, бабалық шағын алаңсыз өткізген жас түлектердің мектебімен, әліппеден бастап өмір заңдарына дейін үйреткен ұстаздардың шәкірттерімен қоштасу мерекесі – соңғы қоңырау соғылды. Үздік оқығаны үшін 53 оқушы, бір топ ұстаз мадақтамамен марапатталды.

Облыстық кәсіподақ комитетінің «Кәсіподаққа еңбегі сіңген»» төс белгімен бастауыш сынып мұғалімі Қыпшақбаева Асемкүл, «Нұр Отан» партиясының Алғыс хатымен Арымбаева Сағдат, Туляева Жанна, Жабаева Майра, Абдиева Ләззат, «Рухани жаңғыру» Ұлттық бағдарламасы құрметіне арналған «Бейбітшілік әлемі – Планета мира» Халықаралық Бірлестігінің 10 жылдығы аясында педагогика саласында заманауи білім, саналы тәрбие берудегі ұзақ жылдардағы мол еңбегі үшін «Ұстаз Даңқы – 100 Есім» төсбелгісімен директордың тәрбие ісі жөніндегі орынбасары Омар Салыбеков, қазақ тілі пәнінің мұғалімі Сара Абуова, тәрбиеші Жамал Сыздықова, облыс оқушылары арасында «Жастар – мәңгілік тәуелсіз елдің болашағы» атты өнер фестивалінде көрсеткен сан қырлы өнері мен шығармашылықтары үшін Фарида Наурызбаева, Бақытжан Ахметов, Шархия Ташқараева, Ақерке Балғынбаева облыстық білім басқармасының, Гүлнұр Жұмағали, Баянсұлу Асылбекова, Қасиет Қуандық, Динара Абибулла, Жасмин Нұрғали, Нұрсұлтан Тағай, Жанар Тасбалта, Асел Куленбаева, Ораз Олжабай сынды оқушылар облыстық қосымша білім беруді дамыту орталығының мадақтамасымен марапатталды.

Аудандық ардагерлер кеңесі жанынан ашылған «Әжелер алқасы» ұйымының төрайымы Л.Жанысбекова осы мектепте ұстаздық еткен Ж.Жамаловты еске алып, сол кісінің атындағы кабинеттің 5 «а» сыныптың үздік оқушылары Інжу Юсупова, Бекболат Тасбалта, Алера Смайыл, Оразхан Рахматуллаға Ж.Жамалов атындағы стипендияны және бір топ екпінді 9 оқушыға сыйлықтар табыстады. Ардагер ұстаздар Р.Саркулова, Ш.Есенбекова өткен жылдардан сыр шертті.

Күлімхан ӘБДІҚАСЫМОВА,

тәрбиешісі.

Көктем

Сәрсенбі, 20 Наурыз 2019 00:00

 

Келді көктем құлпырып,

Бүршік жарды алма ағаш.

Еңбекке дихан ұмтылып,

Тіршілік құрды қарбалас.

Көктемнің күні шуақты,

Айнала көкке оранды.

Жылғалардан су ақты,

Жоғалды қыстың бораны.

Қойнаудан шыққан бұлақтың,

Маржандай суы шашырап.

Тамшысынан төгілген,

Ажарланды атырап.

Тырналар ұшты тізіліп,

Балалар асыр салады.

Көктемгі жаңа тіршілік,

Құлпыртты сайын даланы.

Көрінісіндей көлдердің,

Көгертер нөсер қияқты.

Көк майсадағы төлдердің,

Қуаныш сыры сияқты.

Жеті қырлы шапағат,

Тарихындай өткеннің.

Далаға ұлық махаббат,

Келбетіндей көктемнің.

Ұлылық дәстүр салтыма,

Құлпырған көктем келісті.

Доңыз жылы халқыма,

Әкелсін бақыт, жеңісті!

Ө.ШАЛҒЫНБАЕВ.

Білімді оқырман – болашағымыз

Дүйсенбі, 11 Наурыз 2019 00:00

Оқырмандар сайысы

 

     Жуырда «Қақпақ» жалпы орта мектебінің мұғалімдерінің ұйымдастыруымен бірнеше іс-шаралар ұйымдастырылды. Атап өтер болсақ, 1-11 сынып арасында «Лидер Reader – ON», бастауыш сынып мұғалімдері Ү.Досыбай, Э.Исабекова, А.Сұлтанбаева кітапханашы Г.Қоңыратбаева ертеңгіліктер өткізді.

«Лидер Reader – ON», «Менің сүйікті жазушым» атты шарада оқырмандар сүйікті жазушысының шығармасынан үзінді оқып, көрініс көрсетті, әртүрлі сала бойынша креативті ойлау жүйесі дамитыны, вербальды қабілеттер артатыны туралы қысқаша мәлімет берілді. Мектеп директорының тәрбие ісі жөніндегі орынбасары Абдыхалық Қуанышов бүгінде ұлттың бәсекеге қабілеттілігі оның білім деңгейіне байланысты екендігін айтып, осы іс-шаралардың маңыздылығына тоқталып өтті. Кітап адамды жан-жақты дамытады, ой өрісін кеңейтеді» дегенді дәйектеп, барша жастарды кітап оқуға шақырды. Сайыста мектебіміздің ең-ең білімді оқушылары   «Тапқыр болсаң – тауып көр», «Кітап қасиеті – мәңгілік», «Күш – білімде, білім – кітапта», «Білімді оқырман – болашағымыз» кезеңдерінде бақтарын сынады.

   Сайыс барысында оқушылардың   үлкен дайындықпен келгендігі айқын аңғарылды. Мұндай оқырмандар арасындағы байқаулар әлі де жалғасын таба бермек. Оқушылардың 15 минуттық ұзақ қоңырауында кітапханаға келіп, кітап оқуларына жағдай жасалған.

Г.Қоңыратбаева,

«Қақпақ» жалпы орта

                мектебінің кітапханашысы.

Ана туралы толғау

Дүйсенбі, 11 Наурыз 2019 00:00

                                                         Оқушы дәптерінен

                                                  

     Әлемдегі ең сұлу және ең керемет атау – Ана! Ана – қасиетті де, киелі есім! Ана жайлы ойымды айтып тауыса алу мүмкін емес. Әркімнің өз анасына деген махабатты шексіз.

     Ана – бізді тоғыз ай, тоғыз күн құрсақта көтеріп, толғатып, бізді жарық дүниеге алып келген адам. Ол сені тәрбиелейді, ақ сүтімен асырайды, өсіреді. Ана саған киінуді, тамақ жеуді, жазуды, жүруді, жүгіруді үйретеді. Сен анаңның арқасында адам боласың! Қазіргі ұстаз, ақын, жазушы, ғалым да, даналар да, бәрі анадан шығады. «Алып-анадан туады» деген мақалдың да мәні осында. Ана болмаса ешкім жоқ! Ананы қадірлеу, құрметтеу, айтқанын тыңдау керек. Анасыз мына дүние де, әлем де жоқ.

     Қартайғанда кейбіреулер оны қарттар үйіне апарады, кейбіреулер көңіл бөлмейді. Сонда сен оған қарамасаң, ол сені неге дүниеге әкелді? Неге өсірді? Неге ақ сүт берді? Неге, неге? Ананың қадірін білсең, болашақ балаларың да, сенің қадіріңді біледі.

     Сол себепті ананың қадірін білейік! Ана – біздің өміріміздің гүлі мен нұры. Сол үшін мен анама жүрегіммен жыр жаздым.

Ардақты анам

Махабатым, шапағатым, құшағым,

Бір өзіңді мен-ақ көріп қуандым!

Данамсың сен, дарамсың сен анашым!

Құдай берген нұрым менен гүлімсің!

Тоғыз ай арқаладың құрсағыңда,

Аямадың ақ сүтпен нәрінді сен!

Өмірдің бар бақытын тілеп саған

Жүреміз бақытты бол анашым деп!

Сен қуансаң мен қуандым гүлім деп,

Қуанамын құдай бақты берді деп!

Таба алмадым бұл әлемнен-

Таппаймын да сендей жанды, берді деп!

Өсірдің, арқаладың, ақ сүтіңмен,

Қандай бақыт көрмедік бір көзіңнен!

Сен күнімсің жадыраған нұр төккен,

Сен жұлдызсың жалтыраған,жұрқ еткен,

Сен бақытсың жалындаған, шарықтаған,

Сен аққусың айдынында нұр төккен!

Күндей жайна гүлдей жайна нұр болып,

Жарқырайсың жұлдызбенен күн болып!

Аспандағы ақ сұлуым айымсың,

Майысқан бір сұлусың сен қайыңсың!

Аспандағы жарықтаған жұлдызсың-

Бір бақытты құдай саған бұйырсын!

Мен өзіңмен бірге жүрем әрдайым,

Махаббаттың құшағында күн сайын

Шапағатым, шуақ шашқан өзіңсің

Гүлімсің, шашылатын шуағым!

Мөлдіреген, көгілдір өзенімсің!

Нұр төгіп келе жатқан көктемімсің,

Алғаш шыққан гүлімсің бәйшешегім!

Қарлығашым, аяулы құсымсың!

Жалғыз сенсің алтын құрсақ шуағым,

Махабатым, шапағатым, шаттығым!

Ардақтымсың, аяулымсың, қымбаттым,

Бәрінен де бақыттысың, анашым!

Ақерке Даулетова,

«Диқан» жалпы орта мектебінің

5-сынып оқушысы: