– Жыл сайын Қазақстанда орташа есеппен 2 мыңнан астам жемқорлыққа қатысты қылмыс-тық іс тіркеледі. Мыңнан аса адам жауапқа тартылады. Бұл – батпандап кіріп, мысқалдап шығатын кесел. Осы ауруды қазір шұғыл түрде емдемесек, ертең кеш болуы мүмкін, – дейді Қ. Тоқаев.
Мемлекет басшысы жемқорлықтың тамырына балта шаппаса, ұлттық қауіпсіздік пен мемлекеттің болашағына нұқсан келтіретінін айтты. Сондықтан, жемқорлықтың тамырына балта шауып, түбегейлі жою қажет. Бұл дертпен бір жеңнен қол, бір жағадан бас шығарып, бірлесіп күресуге шақырды. Мемлекетте оған қажеттінің бәрі бар екенін атап өтті.
– Біріншіден, бізде жемқорлыққа қарсы күресте қару бола алатын мықты мемлекеттік институттар бар. Мемлекеттік аппарат жұмыс істеу тәсілін өзгертіп, жемқорлықтың жолын кесуі керек. Екіншіден, жемқорлықпен күрес халықтың табанды сұранысына ие. Әкімшілік сауалнама жүргізеді, өзім де ел аралап жүремін. Сонда байқағаным, біздің қоғам жемқорлықпен ымырасыз күресуге дайын. Үшіншіден, біздің елді дамытуға және халықтың әл-ауқатын арттыруға бағытталған жоспарларымыз жемқорлықты түбегейлі жойған жағдайда ғана жүзеге аспақ, – дейді Президент.
Мемлекет басшысы соңғы үш жылда 900-ден астам адамның жемқорлықпен ұсталғанын, мемлекеттік бағдарламалардың сапалы орындалуына осындай оқиғалардың кедергі келтіретінін жеткізді.
– Біз экономиканы жаңғыртуға, ауқымды әлеуметтік бағдарламаларды жүзеге асыруға қазынадан қыруар қаржы бөлеміз. Алайда, жемқорлықтың салдарынан мемлекеттік бағдарламалар сапасыз орындалуда. Бұл халықты әлеуметтік қорғауда, ауыз сумен қамтамасыз етуде мәселелердің уақтылы шешілмегенін көрсетеді. Жергілікті жолдардың сапасыздығы мен бизнестің дамуына кедергілер де – жемқорлықтың кесірінен туындаған проблемалар. Азаматтар бюджеттің әрбір теңгесінің мақсатты жұмсалатынына көз жеткізуі керек, – деді.
Қасым-Жомарт Тоқаев биліктің жемқорлыққа қарсы іс-қимыл жоспарының жеті негізгі шарасын атап өтті.
– Бірінші – азаматтардың құқығын қорғау. Мен Конституцияға сәйкес ұлтына, дініне, мүлік жағдайына қарамастан, барлық азаматтар тең деген ережені басшылыққа аламын. Ешкім де заңнан биік емес. Қол астындағы қызметкерлердің жемқорлыққа қатысы болса, орталықта да, өңірлерде де бірінші басшылар тікелей жау-ап береді. Сондықтан, кешенді алдын алу шараларын қолға алу қажет, – деді.
Қ. Тоқаев екінші шара ретінде мемлекет пен азаматтық қоғам институттарының конструктивті әріптестігін атап, жемқорлықпен күресте күштік шаралар аздық ететін айтты. Үшінші шара ретінде қоғамдық бақылауды күшейту, төртінші – бюджеттік саясаттың ашықтығы, бесінші – жемқорлыққа қарсы саясатта өңірлердің рөлін күшейту қажеттігі, алтыншы – мемлекеттік қызмет көрсету ісіндегі үдемелі цифрландыруды айтты. Ал жетінші шара – мемлекеттік сатып алу жүйелерін жетілдіріп, бизнеске әкімшілік қысымды төмендету.
Жиын соңында мемлекет басшысы жемқорлық бойынша қол астындағы қызметкерлердің қылмыстық әрекеттері үшін бірінші басшылардың жауапты болатынын тағы бір мәрте қадап айтты.
– Егер біз жемқорлықты түбегейлі жоюды міндет етіп алсақ, меніңше, мемлекеттік орган басшылары мұндай жағдайда отставкаға кетуі керек. Олардың отставкаға кетуін қабылдауды немесе қабылдамауды Мемлекет басшысы шешеді. Бірақ жұмыстан босату туралы арыз жазуы міндетті шара болуы керек, – дейді Қ. Тоқаев.
Үкімет пен Президент әкімшілігіне осы жиында көтерілген мәселелерді шешу үшін енгізілген ұсыныстар негізінде жұмыс істеу тапсырылды.

Қазақстан Президенті Ішкі істер министрлігінің кеңейтілген алқа отырысына қатысты. Алқа отырысына Қазақстан Республикасы Президенті Әкімшілігінің Басшысы Б. Сағынтаев, Қазақстан Республикасы Президентінің көмекшісі – Қауіпсіздік Кеңесінің хатшысы Қ.Қасымов, Премьер-Министрдің бірінші орынбасары – Қаржы министрі Ә. Смайылов, Президент­ Әкімшілігінің және Ішкі істер министрлігінің басшылық құрамы қатысты.

                     

Еліміздің «Сыбайлас жемқорлыққа қарсы күрес туралы» Заңына сәйкес мемлекеттік міндеттерді атқаратын адамдардық, сондай-ақ, соларға теңестірілген адамдардың лауазымдық өкілеттігін және соған байланысты мүмкіндіктерін пайдалана отырып, не мүліктік пайда алу үшін олардың өз өкілеттіктерін өзгеше пайдалануы, жеке өзі немесе делдалдар арқылы заңда көзделмеген мүліктік игіліктер мен артықшылықтар алуы, сол сияқты бұл адамдарға жеке және заңды тұлғалардың аталған игіліктер мен артықшылықтарды құқыққа қарсы беруі арқылы оларды сатып алуы «Сыбайлас жемқорлық» деп ұғынылады. Сыбайлас жемқорлық – бүгінгі күнге дейін жойылмай отырған кеселдің бірі, дамушы елдердегідей біздің мемлекетімізге де орасан зор нұқсан келтіріп отыр. Жемқорлық мемлекеттік органдардың тиісті қызмет атқаруына кері әсерін тигізіп, беделіне нұқсан келтіреді, заңды қағидаларды теріске шығарып, азаматтардың конституциялық құқықтары мен заңды мүдделерінің бұзылуына түрткі болады. Қазақстан Республикасының «Сыбайлас жемқорлыққа қарсы күрес туралы» Заңына сәйкес, сыбайлас жемқорлықпен күрес барлық мемлекеттік органдар мен онда қызмет атқаратын лауазымды тұлғалар жүргізуі тиіс. Бұл дерттің алдын алып, қоғамға таралу жолдарын кесіп, оның ұлғаюына жол бермеу керек. Сонда ғана ел мүддесі үшін үлес қосып, халық сенімінен шығатынымыз анық.

Б.ШӘКІР,

аудандық ветеринария

бөлімінің бас маманы.

Нашақорлық пен есірткіге жол жоқ!

Сәрсенбі, 20 Наурыз 2019 00:00

 

Есірткіге қарсы күрес – күн тәртібінен түспейтін өзекті мәселе. Жасөспірімдер үнемі үлкендердің, ата-анасы мен жақын-жанашырларының бақылауында болуы тиіс. Ауданымызда жастардың бос уақытын тиімді өткізу үшін «Спорт – есірткіге қарсы» деген ұранмен спорттың бірнеше түрлерінен аудандық жарыстар жыл бойы ұйымдастырылу қолға алынған. Аудандық дене шынықтыру және спорт бөлімі Түркістанда нашақорлыққа және есірткі бизнесіне қарсы күресті, бағдарламаға сәйкес, тиімді спорттық жұмыстар атқаруда. Жыл сайын аудандық деңгейде «26- маусым – Халықаралық нашақорлыққа қарсы күрес» күніне орай спорттың бірнеше түрінен жарыстар өткізіліп келеді. Бүгінде жасөспірімдермен барлық бағытта жұмыс жасап жатырмыз.

Нашақорлық дертіне шалдыққан адам өзінің денсаулығына, қоршаған адамдардың өміріне қауіп туғызады. Күн өткен сайын елімізде нашақорлыққа байланысты жасалатын қылмыстың саны күрт өсіп отырғаны ешкімге жасырын емес.

Нашақордың есірткіден улануы оның бүкіл психикасын өзгертеді. Біріншіден, жүйке жүйесін бірден улайды, ақылмен істейтін жұмыстардан бас тартатын болады, ынтасы, белсенділігі пәс болып, енжар өмір кешеді. Есірткі адам психикасына өте қатерлі. Ең қатерлісі – нашақор есірткіге ақша табу үшін кісі тонаудан бастап, тіпті, жақын адамын өлтіруден де тайынбайды. Бұл күнде жігіттер ғана емес, қыздардың да темекі тартатыны, арақ ішетіні, есірткіге берілетіні ешкімге сыр болмай қалды. Бұл, әрине, өкінішті жай! Өйткені, бұлардың қайсысы болсын денсаулық үшін зиян. Нашақорлар – қайғылы оқиғалардың басты себепкерлері. Жасыратыны жоқ, көрінгенге еліктегіш кейбір жастарымыз әртүрлі себептермен есірткіге алғашқыда қызығушылық білдіріп, кейін өздерінің қалай бастары байланып қалғанын сезбей қалады. Нашақорлар есірткінің қандай түрін қолданса да, тартатын зардабы біреу. Алайда, болашағына мән бермейтін нашақорлар түбінде жақсылық әкелмейтінін сезінуі қажет.

Т.МЕҢЛІБЕКОВ,

аудандық дене шынықтыру және спорт

бөлімінің бас маманы.

 

Қазіргі уақытта сыбайлас-жемқорлық әлеуметтік құбылыс ретінде әлемнің барлық елдерінде, оның ішінде Қазақстанда да тамырын жайып отыр. Сыбайлас-жемқорлық әлеуметтік экономикалық даму үрдісіне, рыноктық экономиканың құрылысына, инвестицияларды тартуға залалын келтіруде. Демократиялық мемлекеттің саяси және қоғамдық институттарына да кері әсерін тигізуде, болашақтағы еліміздің дамуына үлкен қатер төндіруде.

Сыбайлас жемқорлық мәселесі мемлекет пен қоғамның бүкіл саласына қатысты өткір сипат алып, өзектілене түсуде. Жемқорлық дерті мемлекеттік қызметке баратын жастардың және пара алатын лауазымды тұлғалардың беделін түсіріп қана қоймай, билік жүйесінің, сонымен қоса бүкіл әлеуметтік жүйенің құлдырауына әкеп соғуымен қауіпті.

Бүгінгі заманда жастар арасында сыбайлас жемқорлықтың таралуына жастардың жұмыссыздығы, баспана мәселесі, елдегі әлеуметтік ахуалдың әлі де төмендігі, билік құрылымдарының жауапсыз іс-әрекеттері, осы саладағы тиісті заңнаманың өз деңгейінде орындалмауы, жастардың құқықтық санасы мен білімінің төмен болуы, қоғамда демокартиялық дәстүрлердің сақталмауы, сот жүйесіндегі әділетсіздіктер және т.с.с. көптеген себептер әсер етеді. Жастардың сыбайластық көріністеріне көз жұмып қарауы мен пара берушілікке бой алдыруы үрдіске айналмауы тиіс.

Жемқорлықпен пәрменді күресу үшін халықтың құқықтық сауатсыздығын жоятын, құқықты түсіндіру жұмысының деңгейі мен сапасын арттыру керектігінің маңызы зор. Азаматтар өздерінің құқықтарын, өздеріне қарсы қандай да бір құқыққа қайшы іс-әрекет жасалған жағдайда қандай іс-қимыл қолдану керектігінің нақты білулері қажет. Әсіресе, жастар осы тұрғыда сауатты болуы керек.

П.ЫРСАЛЫ,

«Жастар ресурстық орталығының»

басшысы.

Жемқорлық – жегі құрт

Сәрсенбі, 20 Наурыз 2019 00:00

 

Бүгінгі қоғамның жегі құртына айналған сыбайлас жемқорлықты ауыздықтасақ, өңірімізде өркениетті елдердегідей қоғам қалыптасады.

Әрбір өркениетті қоғам үшін сыбайлас жемқорлықпен күрес – өзекті мәселелердің бірі. Жемқорлық – қазақ елінің бәсекеге қабілеттілігіне нұқсан келтіріп, халықаралық беделіне сызат түсіреді. «Жемқорлық – індет, жою – міндет» дегендей, онымен күресуді әр азамат өзінің борышы санауы керек.

Оған қарсы пәрменді күрес жүру үшін бірінші кезекте санаңыз сау болуы тиіс. Салауатты сана қалыптасқан жағдайда кез келген адам адамгершілікке жат қылықтардан бойын аулақ ұстап, заңға қайшы әрекеттерді жасауға жол бермейді.

Сыбайлас жемқорлықпен күресу Қазақстан Республикасы Президентінің назарынан ешқашан тыс қалған емес. Елбасы өз халқына арнаған Жолдауында «Сыбайлас жемқорлық қоғамға, мемлекеттің конституциялық негізіне қауіп төндіреді. Сондықтан, онымен күрес жүргізу жалпыұлттық міндет» деген болатын.

Біздің де айтарымыз Заңға сәйкес қылмыстың бұл түрімен күресті барлық мемлекеттік органдар мен онда қызмет атқаратын кез келген тұлғалар жүргізуі тиіс. Себебі, құқық бұзушылыққа немқұрайдылық танытып, жеке басының қамын ойлауы да парақорлықтың дендеуіне ықпалын тигізуде.

Ғасыр дертіне айналған «жемқорлыққа» қарсы күресте оның тамырына балта шабуда баршамыз табандылық танытып, аяусыз күрессек қана нәтижеге жетеміз.

Ө.ШАЛҒЫНБАЕВ,

С.Рақымов ауыл округі.

Жемқорлық – індет, күресу – міндет!

Дүйсенбі, 11 Наурыз 2019 00:00

 

Сыбайлас жемқорлықпен күресу Қазақстанның бүгінгі күнгі күрделі мәселесі болып отыр. Үлкен әлеуметтік қасірет болып табылатын ол саяси даму тұрғысынан бір-біріне ұқсамайтын әлемдегі барлық елдердің қай-қайсысын да қатты алаңдататыны анық.

Сыбайлас жемқорлық – індет, оған қарсы күрес –міндет деп айтып  жүрміз. Ендеше, оның алдын алу үшін халық арасында ағарту, насихат жұмыстарын тереңінен жүргізу. Біздің қоғам ақниетті, адал, намысы биік азаматтарды қажет етеді. Осы тұста, соңымыздан ерген ұрпақ тәрбиесін де ұмыт қалдырмауымыз қажет.

Болашақта өскелең ұрпақ жемқорлыққа жирене қарауы үшін біз қандай әрекет жасап, оларға қандай бағыт сілтей аламыз?! Бүгін, ертең демесек те, алдағы 10-15 жылдан  кейін сыбайлас жемқорлықты толығымен ауыздықтап тастамасақ та, оның қазіргіден әлдеқайда әлсізденетіндігіне өз басым кәміл сенемін. Сол мақсатқа жету үшін әрбір отбасында,  балабақшада тәрбиеленетін, мектепте білім алатын баланың бойына имандылық пен адамгершілікті, еліне, жеріне, ұлтына деген жанашырлық, патриоттық сезімді тереңінен сіңіруіміз шарт. Жаны таза, ары ақ, елі мен жерін көркейтер нағыз азамат қалыптасуы үшін ұлттық рухты жас ұрпақ бойына дұрыс дарыта алуымыз қажет. Сонда ғана біз оны қоғамымызға қауіп төндіріп, орасан кесел келтіретін жемқорлықтай келеңсіз әлеуметтік құбылыстан арашалай аламыз. Сол себепті, ұлтжанды азамат тәрбиесіне селқос қараудан аулақ болған жөн. Қайта, бар назарымызды ұрпақ тәрбиесіне шоғырландыра алсақ, жарқын болашаққа  сенімді әрі нық қадам тастарымыз анық.

Гүлжан АХАЕВА,

Қазығұрт ауданы бойынша Мемлекеттік кірістер

басқармасының басшысы.

Қаперіңізде болсын!

 

      2019-жылғы 21-қантарда «Қазақстан Республикасының кейбір заңнамалық актіліріне меншік құқығын қорғауды күшейту, төрелік, сот жүктемесін оңтайландыру және қылмыстық заңнаманы одан әрі ізгілендіру мәселелері бойынша өзгерістер мен толықтырулар енгізу туралы» заңға қол қойылып, құзыретті органдардың міндеттері өзгеріске ұшырады. Онын ішінде Азаматтық процестік кодексіне және «Нотариат туралы» Заңға өзгерістер енгізілгені туралы тоқталғым келеді.   Жалпы бұйрық арқылы іс жүргізудің 18 талабының 9-ы нотариатқа, оңайлатылған тәртіппен іс жүргізудің 12 санаттарының 10-ы бұйрықтық іс жүргізуге берілді.

     2019-жылдың 3-ақпаннан бастап, сотта қаралып келген бірқатар азаматтық даусыз талаптардың 9 түрін нотариустар қарайды.

Атап келгенде:

1) Жалақыны өндіріп алуға байланысты. Айлық жалақысын өндіре алмай жүргендер енді сотқа емес, нотариусқа баруы керек. Нотариус мән-жайды анықтап, құжаттар түгел болса, атқарушылық жазба шығарып береді. Ал, атқарушылық жазбаның күші сот актісінің күшімен бірдей.

2) Коммуналдық қызметтер бойынша берешекті өндіру туралы (электрмен, газбен, жылумен, сумен, телефонмен жабдықтау және басқалары);

3) Нотариат куәландырған қарыз шарты бойынша міндеттемені орындауға бағытталған.

4) Орындау мерзімі басталған және міндеттеменің орындалмауын борышкер мойындаған, жазбаша мәмілеге негізделген міндеттемені орындау туралы.

5) Нотариус жасаған, төлем жасалмауына, ақцептінің болмауына және акцепт күнінің   белгіленбеуіне вексель наразылығына негізделген міндеттемені орындау туралы;

6) Лизинг шартына немесе Қазақстан Республикасының заңдарына сәйкес лизинг нысанасын талап ету туралы;

  7) Ломбард кепіл беруші-борышкерге қойған, кредитті қайтару мерзімі өткен соң кепіл нысанасына өндіріп алуды қолдану;

   8) Кондоминиум объектісінің ортақ мүлкін күтіп-ұстауға арналған міндетті шығыстарға қатысудан жалтаратын үй-жайлар (пәтерлер) меншік иелерінен берешекті өндіріп алуды қарау;

   9) Жалдау төлемдерін жалдау шартында белгіленген мерзімдерде төленбеуіне байланысты өндіріп алу туралы талаптар.

     Енді, нотариалдық жазба бойынша өндіріп алу мүмкіндігі болса тараптар сотқа жүгінбейді. Сотқа жүгінген жағдайда судья талап қою арызын қайтарады, егер талап қоюшы дауласу ниетінен қайтпаса, заңда белгіленген дауды реттеудің соттан тыс тәртібін бұзса, судья іс бойынша сот шығыстарын талап қоюшыға жүктейді.

     Егер, Сізден коммуналдық берешек төлемдерді және жоғарыда көрсетілген даусыз талаптар бойынша өндіріп алу туралы нотариустан атқарушылық жазба келген жағдайда таң қалманыз, себебі биылғы жылдың 3 ақпан айынан бастап, жоғарыда аталғандай мұндай берешекті өндіру нотариустың атқарушылық жазба жасауы арқылы жүргізілген болады.

     Нотариус көрсететін қызметтің құны заңмен бекітілген, оның мөлшері сот алдындағы мемлекеттік баж салығынан әлдеқайда арзан. Сот бұйрығын ұсынуға қарағанда, нотариуспен орындау жазбасын жасау үшін борышкердің келісімі қажет емес, сотта істің қаралуымен салыстырғанда, нотариаттық әрекетті жасау мерзімі қысқа.

        Азаматтық процестік Кодексіне енгізілген өзгерістердің бірі- тараптардың келісімдеріне негізделген 10 талап оңайлатылған (жазбаша) іс жүргізуден соттың бұйрықтық іс жүргізуіне берілуі.   Судья сот бұйрығын  борышкерді және өндіріп алушыны   олардың түсіндірмелерін тыңдау үшін шақырмай–ақ, мәлімделген даусыз талаптың мәні бойынша арыздың сотқа келіп түскен күннен бастап үш жұмыс күні ішінде шығарады. Сонымен даусыз 10 талап түрі бойынша істі сотта қараудың мерзімі барынша қысқартылған және тараптардың уақытын, қаражатын үнемдейді, олардың сотқа келуі талап етілмейді.

                                   Г. РАХИМБАЕВА,

Қазығұрт аудандық сотының судьясы.

  

 

2014-жылы 26-желтоқсанда Елбасы Қазақстан Республикасының 2015-2025 жылдарға арналған сыбайлас жемқорлыққа қарсы стратегиясын бекітті. Стратегияда мемлекеттің алдағы жылдарға арналған сыбайлас жемқорлыққа қарсы саясаттың негізгі бағыттары көрсетілген және сыбайлас жемқорлықтың алғышарттарын, оны тудыратын себептері мен жағдайларын жою, оның деңгейін қысқартуға ықпал ететін кешенді шараларын қамтиды. Стратегияда еліміздегі сыбайлас жемқорлыққа қарсы күрестің ахуалына талдау жасалған, сыбайлас жемқорлық көріністеріне ықпал ететін негізгі факторлар сипатталған, оларды жою жөніндегі тәсілдер мен басым шаралар, стратегияны іске асыру тетіктері көрсетілген. Стратегияны іске асыру нәтижесі халыққа мемлекеттік көрсетілетін қызметтердің сапасын, мемлекет институттарына қоғамның сенімін, азаматтардың құқықтық сауаты мен сыбайлас жемқорлыққа қарсы күрес мәдениеті деңгейін көтеру, сондай-ақ, еліміздің халықаралық рейтінгін жақсарту шаралары қаралған. Мәңгілік Ел болу идеясын іске асырудағы бірден-бір шаралардың қатарына да сыбайлас жемқорлықпен күресті жатқызуға болады. Сондықтан, бүгінгі таңда сыбайлас жемқорлықпен күрес жалпы барша халықтың борышы екенін атап көрсетіп, жемқорлыққа қарсы күрес жан-жақты, үздіксіз, ашық әрі әділетті түрде жүргізілуі тиіс. Біз сонда ғана алға қойған биік мақсаттарға қол жеткізе аламыз және қоғамды жегідей жеп жатқан қауіпті індетпен көп болып күресуіміз  қажет.

Тарихы тереңнен бастау алған сыбайлас жемқорлық бүгінде бүкіл әлем қоғамдастығына қауіп төндіріп отыр. Біздің республикамызда да бұл мәселеге қарсы күрес шаралары тәуелсіздік алған сәттен бастап, мемлекеттің бірінші кезектегі міндетіне айналды. Қазіргі таңда қоғамымызға қауіп төндіріп, орасан кесел келтіретін осынау келеңсіз әлеуметтік құбылысқа қарсы шаралар қатаң қолға алынып жатыр.

Елімізде жемқорлықпен және ұйымдасқан қылмыспен күресті күшейту шараларына орай «Сыбайлас жемқорлыққа қарсы күрес туралы», «Мемлекеттік қызмет туралы» арнайы Заңдар қабылданған. Жемқорлықпен күрес арнайы дайындалған мемлекеттік бағдарлама негізінде жүзеге асырылуда. Елбасымыз алға қойған міндеттерді іске асыру, сондай-ақ, сыбайлас жемқорлыққа қарсы күрес саласындағы барлық мүдделі күштердің бірлесіп жұмыс істеуі, елімізді өркендетуге және азаматтарымыздың әл-ауқатын арттыруға мүмкіндік береді. Міне, осы бағдарламаны Қазақстан азаматтарының санасына сіңдіру қазынашылық саласында қызмет етіп жүрген әр маманның да негізгі міндеті болып жүктелген. Жемқорлықтың кез-келген көрінісіне төзбеушілікті табанды түрде санаға сіңдіру мақсатында, ұжымда да іс-шаралар жиі өткізіліп отырады. Қазақстанның әр азаматы өзінің өмірдегі мұратына жету үшін, сыбайлас жемқорлыққа жол бермеу керек деп ойлаймын.     Елбасымыздың өзі тізгінін ұстап отырған еліміздің басты стратегияларының бірі – «Мәңгілі ел» ұлттық идеясы, осы «Мәңгілік елдің» тәуелсіздігін сақтау – біздің басты борышымыз. «Қазақстан халқының әл-ауқатын арттыру – мемлекеттік саясаттың басты мақсаты» атты Қазақстан Республикасының Президентінің Қазақстан халқына Жолдауында «демократиялық қоғам жағдайында қылмыс пен сыбайлас жемқорлыққа қарсы күрес ерекше мәнге ие болады» деп атап көрсетті. Яғни, бұл мемлекеттің осы жағымсыз құбылысты жою бағытындағы кешенді және жүйелі күрес жүргізу саясаты жанданып, әрі қарай жалғасын табады деген сөз. Бұрынғы өткен ата-бабаларымыздың әділдік пен турашылдықты ту еткендігін ғасыр қайраткерлері Төле би, Қазыбек би, Әйтеке би және тағы да басқа біртуар билер мен шешендердің өмірі дәлел болатындығын біз тарихтан жақсы білеміз. Олардың «тура биде туған жоқ, туғанды биде иман жоқ» деген сөздері бекер айтылмаған.

Нұржан Төлейов,

Қазығұрт аудандық қазынашылық

басқармасының басшысы

 

   «Жер қойнауы және жер қойнауын пайдалану туралы» Заңы – жер қойнауын пайдалану саласындағы қоғамдық қатынастарды реттейді және Қазақстан Республикасының мүдделерін қорғауға, жер қойнауын ұтымды әрі кешенді зерттеу мен пайдалануға бағытталған.

Заңсыз жер қойнауын пайдалану – өзендердің су қорғау аймақтарында, орман және ауыл шаруашылығы жерлерінде жүргізіліп жатқандықтан, құқық бұзушылардың мұндай іс-әрекеттері тек мемлекеттің материалдық мүддесіне ғана емес, жергілікті аймақтың экологиялық қауіпсіздігіне де теріс әсерін тигізуде. Осыған байланысты, Қазығұрт ауданының әкімі Т.Телғараевтың «Аудан, ауыл, елдімекен аумағында жер қойнауын өз бетінше пайдалануға тосқауыл қою туралы» іс-шара бекітілген болатын. Заңсыз жер қойнауын пайдалануды тоқтату мақсатында әр ауыл округтерінде жер қойнауын пайдалануға мүмкіндік беретін техникаларға ескертулер беріліп кезекшілік ұйымдастырылған. Заңсыз жер қойнауын пайдаланған жағдайда Қазақстан Республикасының Әкімшілік Кодексінің 334-бабымен жазаланады.

   Құрметті, ауыл округі тұрғындары! Заң бұзушылыққа жол бермей, бірге күресейік!

Н.АЛИЕВ,

Қ.Әбдәлиев ауылдық

округі әкімінің орынбасары.