Жиында еліміздің әлеуметтік-экономикалық дамуына және экологиялық қауіпсіздікті қамтамасыз етуге қатысты мәселелер қаралды.
Нұрсұлтан Назарбаев әлемдік қоғамдастықтың еліміздегі саяси оқиғаларға зор қызығушылық білдіргенін айтты.
– Мен тарихымыздың осы бір бетбұрысты кезеңінде қазақстандықтардың парасаттылық және береке-бірлік танытқанына шынайы ризашылығымды білдіремін. Осы күндері менің атыма мемлекет және қоғам қайраткерлерінен, еліміздің еңбек ұжымдарынан көптеген хаттар мен жеделхаттар келіп түсуде. Шет мемлекеттердің және халықаралық ұйымдардың басшылары телефон арқылы хабарласып, қолдау білдіріп жатыр, – деді Елбасы.
Қазақстанның Тұңғыш Президенті еліміздің өсіп-өркендеуіне және орнықты дамуына бағытталған бағдардан мемлекетіміз айнымайтынына сенім білдірді.
– Біз барлық сынақтан абыроймен өтіп, табыс-ты мемлекет құра білдік. Оны бүкіл әлем біледі әрі құрметтейді. Мен қазіргі Қазақстанның негізін қалағандықтан мемлекетіміздің болашағына және азаматтарымыздың әл-ауқатына баса мән беремін. Менің барлық іс-әрекетім және қадамым осыған арналған, – деді Нұрсұлтан Назарбаев.
Қауіпсіздік кеңесінің Төрағасы Қазақстан халқының мүддесі үшін стратегиялық бағдарламаларды одан әрі жүзеге асырудың маңыздылығын атап өтті.
– Бағдарламаларды жүйелі іске асыру – дамуымыздың басты талабы. Біз азаматтарды тұрғын үймен, жұмыспен, сапалы медициналық көмекпен және біліммен қамтамасыз етіп, мұқтаж адамдарға қолдау көрсету үшін тиісті жұмыстарды жалғастыра береміз. Мұның бәрі – жарқын болашаққа деген инвестиция, – деді Елбасы.
Қазақстанның Тұңғыш Президенті ел экономикасын одан әрі дамыту және жаһандық сын-қатерлерді еңсеру үшін жақсы мүмкіндіктер бар екенін айтты.
Басқосуда, сондай-ақ, Премьер-Министрдің бірінші орынбасары Ә.Смайылов және Энергетика министрі Қ.Бозымбаев баяндама жасады.
Елбасы өңірлердегі экологиялық жағдайды тиісті бақылауда ұстау және осы саладағы заңнаманың бұзылуына жол бермеу қажеттігіне назар аударды. Нұрсұлтан Назарбаев бұл шаралар, ең алдымен, халықтың тұрмыс сапасын жақсартуға бағытталғанын атап өтті.
Отырыс қорытындысы бойынша Үкіметке, облыстардың, Нұр-Сұлтан, Алматы, Шымкент қалаларының әкімдеріне нақты тапсырмалар берілді.

Қазақстан Республикасының
Тұңғыш Президенті – Елбасының
Баспасөз қызметі

 

Түркістан облысындағы аудан, қалаларға 1 млрд. теңге қаржы беріледі. Бұл қаражат халыққа биыл пайдасы тиетін, нәтижесі көзге көрінетін, жылдар бойы шешімін таппаған мәселелерді шешуге жұмсалуы керек. Облыстық мәслихаттың алтыншы шақырылымдағы кезекті XXXVII сессиясында аймақ басшысы Өмірзақ Шөкеев осындай мәлімдеме жасады.

Облыс әкімі бұл бастама аудандардағы қордаланған өзекті мәселелердің шешімін табуға оң септігін тигізетінін айтады.

«Түркістан облысының аудандары мен елді мекендерін дамыту бойынша жұмыстар жүргізілу қажет. Елді мекендердің мәселелерін жүйелі түрде шешуіміз керек.  Осыған орай, аудандарды қолдау мақсатында алдағы үш жылда 1 млрд. теңге көлемінде қаржы бөлінеді. Бұл қаражатты дұрыс бағытта жұмсап, игерген ауданға кейінгі жылы 2 млрд. теңге берілсе, ал игере алмаған аудандардың қаражаты керісінше қысқарып отырады. Осы арқылы ауданда атқарылған жұмыс нәтижесін аңғаруға болады», – деді Өмірзақ Естайұлы.

Сондай-ақ, өңір басшысы облыс бюджетінің кіріс бөлігінің тым аз екенін сынға алып, оны екі есеге ұлғайтуға кірісетіндігін жеткізді.

«Бюджеттің кіріс бөлігіне қатысты айтар болсам, облыс тек 53 млрд. теңге ғана кіріс табуда, менің ойымша, облыс кірісін  100 млрд. теңгеге дейін, яғни 2 есеге ұлғайтуға қабілетіміз жетеді. Сондықтан да бюджеттің кіріс бөлігін ұлғайту жөніндегі жұмысты жоспарлы түрде жүргізу қажет. Сондай-ақ,  республикалық бюджет қаражаты қаралған облыстың Кешенді даму жоспарын қайтадан дұрыстап қарау қажет», – деді Ө. Шөкеев.

Түркістан облысы әкімінің баспасөз қызметі.

  

Қазақстан Президенті Қасым-Жомарт Тоқаев алдағы сайлаудың ашық әрі әділ өтетініне кепілдік берді, – деп хабарлайды Sputnik Қазақстан тілшісі.

Қазақстан – демократиялық мемлекет. Президент халықтың таңдауымен сайланады. Мен, мемлекет басшысы ретінде, сайлаудың таза, ашық әрі әділ өтуіне кепілдік беремін. Бұл менің берік ұстанымым", деді Тоқаев ел халқына арнаған үндеуінде.

Президент алдымызда зор міндеттер тұрғанын, Қазақстан халқына сенім артатынын айтты.

– "Алтау ала болса, ауыздағы кетеді, төртеу түгел болса, төбедегі келеді", – дейді дана халқымыз. Алдағы сайлауға баршаңызды барынша жауапкершілікпен қарауға шақырамын. Еліміздің келешегі, әр отбасы мен әр азаматтың тағдыры сіздердің шешімдеріңізге тікелей байланысты, – деді мемлекет басшысы.

Қазақстан Президенті Қасым-Жомарт Тоқаев республикалық телеарналар арқылы ел халқына үндеу жариялап, Президенттің кезектен тыс сайлауы өтетінін мәлімдеген-ді. Мерзімінен бұрынғы сайлау осы жылдың 9-маусымында өтеді.




 

Назарбаев Тұңғыш президент кеңсесінің алдына қойылған міндеттерді дер кезінде және тиімді орындауды тапсырды.

Елордадағы Назарбаев орталығында Қазақстанның Тұңғыш президенті – Елбасы Нұрсұлтан Назарбаевтың төрағалығымен кеңес өтті, – деп хабарлайды Тұңғыш президенті – Елбасының баспасөз қызметі.

Жиын барысында Назарбаевқа Қазақстанның Тұңғыш президенті – Елбасы кеңсесінің қызметіне байланысты ұйымдастырушылық-құқықтық мәселелердің аяқталғаны жөнінде баяндалды, сондай-ақ, Елбасы кеңсесіне кадрларды іріктеу жұмыстарының нәтижелері туралы ақпарат ұсынылды.

Нұрсұлтан Назарбаев Тұңғыш Президент кеңсесінің алдына қойылған міндеттердің уақтылы және тиімді орындалуын қамтамасыз ету қажеттігін атап өтті.

«Мен Тұңғыш президент – Елбасының тиісті конституциялық заңмен реттелетін міндеттерін атқаруға кірістім. Сонымен қатар, мен Қауіпсіздік кеңесінің, Қазақстан халқы Ассамблеясының төрағасымын, «Nur Otan» партиясына басшылық етуді жалғастыра беремін. Алдымызда ауқымды жұмыс тұр. Осы қызметті қамтамасыз ету үшін Тұңғыш президенттің кеңсесі құрылды. Ұйымдастыру мәселелерінің барлығы шешілді. Енді бәріміз жүктелген міндеттерді орындауға кірісуіміз керек», – деді Елбасы.

Назарбаев мемлекетті одан әрі дамыту жөніндегі стратегиялық міндеттерді сапалы шешу мақсатымен ведомствоаралық өзара тиімді ықпалдастық орнатудың қажеттілігін айтты.

«Бүгінде президент те, үкімет те мен бекіткен бағдарламалық құжаттарда, Жолдауда қамтылған, сондай-ақ, партия съезінде айтылған міндеттерді орындау бағытында жұмыс істеуде. Бәріміз Қазақстанның игілігі үшін, еліміздің тұрақтылығын, бірлігі мен дамуын қамтамасыз ету үшін жұмыс істеуге тиіспіз. Бұл – бәрімізге ортақ міндет», – деді Назарбаев.

Қазақстанның Тұңғыш президенті қоғамдық маңызы бар бастамаларды жүзеге асырудың маңыздылығына баса мән берді. Бұл ретте, Нұрсұлтан Назарбаев Тұңғыш президент қорының талантты жастарға жан-жақты қолдау көрсетуге бағытталған жобаларын іске асырудың өзектілігі атап өтті.

Жиын қорытындысы бойынша Елбасы бірқатар нақты тапсырма берді.

 

Ресми кездесу рәсімінен кейін мемлекеттер басшылары шағын және кеңейтілген құрамда келіссөздер жүргізді. Қасым-Жомарт Тоқаев Қазақстан Президенті лауазымына кірісуіне байланысты құттықтағаны және жылы лебіз білдіргені үшін Владимир Путинге ризашылық білдіріп, өзінің алғашқы шетелдік сапарының Ресей Федерациясына жасалуының символдық мәнін атап өтті.

Мемлекет басшысы Қазақстан мен Ресейдің қазіргі ықпалдастығы көпшілік үшін қарым-қатынас жасаудың жарқын үлгісі болып саналатынын айтты.

– Мемлекет басшысы ретінде мен Қазақстанның Тұңғыш Президенті – Елбасы Нұрсұлтан Әбішұлы Назарбаев саясатының сабақтастығын қамтамасыз етіп, Қазақстан мен Ресей арасындағы екіжақты ынтымақтастықты жан-жақты әрі белсенді дамыту ісін жалғастыра беремін, – деді Қасым-Жомарт Тоқаев.

Қазақстан Президенті екі елдің экономикалық ынтымақтастығына, әсіресе энергетика, көлік, транзит, өнеркәсіп және ғарыш салалары мәселелеріне арнайы тоқталды.

– Ресей Қазақстанның сыртқы саудасындағы «нөмірі бірінші» әріптесі болып қала береді. Қазақстанның сауда айналымындағы оның меншікті үлесі 19 пайыз. Инвестициялық ынтымақтастық қарқынды дамуда. Елімізде Ресей капиталы қатысатын 9 мыңнан астам кәсіпорын өз жұмыстарын табысты атқаруда, – деді Мемлекет басшысы.

Владимир Путин Қасым-Жомарт Тоқаевтың Мемлекет басшысы ретінде Ресейге алғашқы сапарының символдық мәнін атап өтіп, екі ел арасындағы байланыстардың жоғары деңгейде екенін айтты.

– Сіз қарым-қатынасымыздың деңгейін білесіз және өзіңіз де бұған көп үлес қостыңыз. Әрине, бұл – Қазақстанның Тұңғыш Президенті Нұрсұлтан Назарбаевтың қажырлы еңбегі. Біздің жай әріптес қана емес, халықаралық ұйымдар аясында да, екіжақты байланыстар бойынша да жақын одақтас екеніміз сөзсіз. Қарым-қатынасымыз өте тиімді дамуда. Нақты әрі айқын нәтижелерге қол жеткізіп келеміз. Бұл халықтарымыздың тыныс-тіршілігінен көрініс тауып отыр. Сіздің бүгінгі сапарыңыз кең ауқымдағы екіжақты одақтастық байланыстарымызды нығайтуға септігін тигізетініне сенімдімін, – деді Владимир Путин.

Кездесу барысында мемлекеттер басшылары мәдени-гуманитарлық саладағы мемлекетаралық өзара ықпалдастық мәселелерін талқылады, сондай-ақ өңірлік және халықаралық күн тәртібіндегі өзекті тақырыптар бойынша пікір алмасты.

 

       

Қазақстан Президенті Қасым-Жомарт Тоқаевтың төрағалығымен Нұр-Сұлтан, Алматы, Шымкент қалаларының және облыстардың әкімдері қатысқан кеңес өтті.

Жиын барысында Премьер-Министрдің бірінші орынбасары – Қаржы министрі Ә.Смайыловтың, Премьер-Министрдің орынбасарлары Ж.Қасымбек пен Г.Әбдіқалықованың, Алматы қаласының әкімі Б.Байбектің және Павлодар облысының әкімі Б.Бақауовтың есептері тыңдалды. 

Қасым-Жомарт Тоқаев еліміздегі әлеуметтік-экономикалық жағдайдың тұрақты екенін және мемлекеттік бағдарламалардың дәйекті түрде жүзеге асырылып жатқанын атап өтіп, кейбір бағыттар бойынша жұмыстарды жандандыру қажеттігін айтты.

– Тұңғыш Президентіміз – Елбасының дана саясатының арқасында ең қиын кезеңдерге табысты төтеп беріп, экономиканың өсу қарқынын қамтамасыз еттік және халықтың әл-ауқатын арттырдық. Қазіргі таңда осы қарқынды сақтауды, жұмыс тәсілдерін жетілдіруді және жүктелген міндеттерді сапалы орындауды қамтамасыз ету қажет. Басты мақсат – азаматтарымыздың әл-ауқатын және болашаққа деген сенімін арттыру, – деді Қазақстан Президенті.

Басқосу соңында Мемлекет басшысы экономиканың өсімін, инвестиция тарту ісін қамтамасыз етуге, әлеуметтік тұрақтылықты нығайтуға, өңірлердегі инфрақұрылымдық және экологиялық өткір проблемаларды шешуге, су тасқынының алдын алуға, тұрғын үй-коммуналдық шаруашылығын және әлеуметтік саланы қамтамасыз етуге, сондай-ақ, көктемгі егіс жұмыстарына дайындық және оны жүргізу жұмыстарын ұйымдастыруға бағытталған бірқатар тапсырма берді.

Берілген тапсырмалардың бәрін қатаң бақылауда ұстау Президент Әкімшілігіне тапсырылды.

 

Нұр-Сұлтан атауы астанамызды одан әрі биіктете түсетіндігіне ешқандай күмән жоқ. «Осыдан 26 жыл бұрын, 1994-жылы сол кездегі Жоғары кеңестің сессиясында Елбасы Н.Назарбаев Қазақстанның астанасын Алматыдан Ақмолаға ауыстыру жөніндегі идеясын жария еткен кезде бұл идеяға сенгендерден сенбегендер көп болды. Үміттен гөрі күдік басым болатын. Экономикалық байланыстар үзіліп, кәсіпорындар жабылып, жұмысыздық көбейген уақытта, айлап айлық, жылдап жалақы төленбей тұрған кезде астананы көшіру ешқандай санаға симайтын нәрсе болып көрінетін. Бірақ, көп ұзамай мұның ұлы идея екендігне көзіміз жетті. Есілдің оң жағалауындағы ескі қала адам танымастай болып өзгерді. Сол жағалауда әлемдегі озық сәулеттік үлгідегі ғимараттар бой көрсете бастады», — деп атап өтті сенатор.

Оның айтуынша, Астананың құрылысы ел экономикасына үлкен серпін берді. Өндірісті дамытудың, құрылыс пен құрылыс индустриясын өркендетудің локомативіне айналды. Елордаға қарап облыс орталықтары бой түзеді. Аудан орталықтары көркейе түсті. Айналдырған 20 жылдың көлемінде Қазақстан астанасы әлемнің жауһарына айналды. Сарыарқаның сары даласына Астана дайын күйде түсе салған сый сияқты көрінді. «Соның артында қаншама еңбек пен ерлік тұрғанын, күлкісіз күндер мен ұйқысыз түндер өткенін біреу білсе, біреу біле бермейді. Сондықтан болса керек, біз түк болмағандай бас қаланың жаңа атауына байланысты түрлі ой-пікір айтып жатамыз. Ол да дұрыс шығар. Демократиялық мемлекет құрып жатқаннан кейін ой плюрализмінің болғаныда оңды. Ол әлемде болып жатқан үрдіс. Бірақ, біздің өз дәстүріміз, салтымыз бар. Біздің ең үлкен құндылығымыз — бірлік пен ынтымақ. Біз азаматымызды ардақтап, ұрпағымызды құндақтай білген халықпыз. Осы тұрғыдан алғанда да Елбасының тәуелсіз мемлекет тұрғызудағы шексіз еңбегін, тарихи рөлін есептегенде күні-кешегі саяси өзгерістер мен қабылданған тарихи шешімдер біздің мемлекетіміздің, халқымыздың өркениеттілігін көрсетті», — деді ол.

Оның атап өтуінше, осы арқылы Қазақстан халқы қай кезеңде болса да пендешіліктен, алауыздықтан, арандатушылықтан шет тұратынын дәлелдеді. Ал бұл шындығында қай мемлекет болмасын жетуді мақсат тұтатын шынар биілігі. Соған Қазақстан жетіп отыр. Қазақстандықтардың басым көпшілігі астананың Нұр-Сұлтан деп аталуына қолдау көрсетуде.

«Нұр-Сұлтан атауы астанамызды одан әрі биіктете түсетіндігіне ешқандай күмән жоқ. Әлемде Нұрсұлтан мен Қазақстан егіз ұғым болып табылады. Н.Назарбаевты халықаралық деңгейдегі реформатор, бейбітшілік бастамалары мен идеялардың авторы, ядролық қарусыз әлем идеясының бастаушысы, тәуелсіз мемлекет құрудың архитекторы ретінде мойындаған алпауыт елдердің басшылары да, ірі инвесторлар да Қазақстанға үлкен сеніммен қарайтындығына ешқандай күмән жоқ. Осының барлығына «тәубе» дегіміз келеді», — деді Әли Бектаев.

Ақұштап Бақтыгереева, ақын, ҚР Мемлекеттік сыйлығының иегері:

- Ұлы даланың еркіндік алған ғасырының тұңғышы болып тізгінін ұстау Елбасының  маңдайына жазылған тағдыр екені даусыз. Сын сағаттардан сүрінбей өткен шыдамыңыз бен парасатыңызға куәміз, ризамыз. «Мың өліп, мың тірілген» ұлтымыздың сан түрлі мінезін де көтеріп, бүкіл әлем алдында абыройын асқақтатып көрсету үшін жасаған істерінің ұшан-теңіз екені тарихқа жазылып қалды. Бұл күнде бүкіл әлем көшпенділер мекені деген қазақ даласын Нұрсұлтан Әбішұлының есімінен танып білгені жасырын емес. Алаш жұртының рухын қайта көтерген қайраткерлігіне бүкіл халық сүйсінді.

Халықтың құрметіне бөленген қазақтың азаматы,  нар тұлғалы ұлт көшбасшысының есімінің Астана қаласына берілуін дұрыс жасалған шешім деп білемін. Және өз тарапымнан оң көзқараста екенімді баса айтқым келеді.

Ұлықбек Есдәулет,  Қазақстан Жазушылар одағы  басқармасының Төрағасы:

- Ширек ғасырдан астам уақытта қиындық пен күрделі кезеңдерді бастан өткерсек те Тұңғыш президентіміз Н.Ә.Назарбаевтың әрбір саяси шешімдері мен жолдаулары, байыпты бағдарламалары ұлттық рухымызды ұстап қала алды. Ол – ел дамуының жарқын үлгісі мен оның нақты қадамдарын көрсететін келелі ой, салиқалы пікір, батыл шешімдерге бара білді. Барлық заманауи тәуекелдер мен жаһандық үдерістерді қоса алғандағы қазақстандық рухани құндылықтың жандануына бағытталған Мемлекет басшының әрбір жолдау мақаласы, өз кезегінде, ұлттық бірегейлікті сақтау, азаматтар санасының ашықтығы мен білімге баулуын дәріптеу, прагматизм, бәсекеге қабілеттілікті арттыру, қоғамдық сананың жаңғыртудың маңыздылығын алға тартты. Сондай-ақ, жедел өзгеріп отырған дүбірлі дүниеде сана-сезіміміз бен дүниетанымымызға әбден сіңісті болып қалған таптаурын қағидалардан арылу және рухани жағынан серпілу керектігін де Н.Ә.Назарбаев әрқашан басты назарда ұстады. 30 жылға жуық уақытта Тәуелсіздігіміздің тамырын тереңдетіп, елдің еңсесін көтеріп, айбынын асқақтататын Астана қаласын әлем білетін елордаға айналдырды. Айтулы қалада қаншама стратегиялық шешімдер қабылданып, іргелі еңбектер жүзеге асырылды. Бүгінгі жеткен жетістігіміз де тікелей Тұңғыш президентімізге қатысты. Елбасының кеше ғана жасаған тарихи мәлімдемесі көрегендік пен кемеңгерліктің нәтижесі деп білемін. Елдің ертеңін ойлайтын, санасы сергек, ұлтты болашаққа бағыттай алатын Қасым-Жомарт Кемелұлы Тоқаевты президенттікке ұсынуында да бірінші кезекте халықты, келешек ұрпақты ойлау мүддесі тұрғандығы анық.

Елбасымыздың өзі бас сәулетшісі болған Астана қаласына Нұр-Сұлтан аты берілу жөніндегі шешімді өз тарапымнан толықтай қолдаймын!

Бүгін Түркістан облысы активімен өтіп жатқан жиын барысында Қасым-Жомарт Тоқаев Президент лауазымындағы мақсатын жария  етті, деп хабарлайды ҚазАқпарат тілшісі.
20190323131909Жиын барысында Қазақстан Президенті ең алдымен барша жұртшылықтың Ұлыстың ұлы күні Наурыз мейрамымен шын жүректен құттықтады.
«Биылғы 19 наурызда, көктемнің шуақты күнінде бәріміз еліміздегі тарихи оқиғаға куә болдық. Мемлекет болашағын ойлаған Тұңғыш Президентіміз маңызды шешім қабылдады. Осындай сындарлы кезеңде Елбасыны және мені қолдаған барша халқыма ризашылығымды білдіремін. Біз биліктің ауысуын тұрақты жағдайда жүзеге асырамыз. Мұндай жағдай дүниежүзі тарихында бұрын болмаған. Бұл ең алдымен Елбасының парасаттылығын, кеңдігін, сондай-ақ халқымыздың даналығын білдіреді. Біз әлемге өркениетті ел екендігімізді танытып, үлгі көрсеттік. Осылайша халқымыздың саяси мәдениетінің жоғары екендігін дәлелдедік»,  — деп атап өтті Қ.Тоқаев.
Сонымен қатар Мемлекет басшысы бұл болашақ ұрпақ үшін де үлкен үлгі-өнеге екендігін баса айтты.
«Менің негізгі мақсатым  — Елбасының  стратегиялық бағытының сабақтастығын қамтамасыз ету. Мен осы істі жалғастыра беремін. Елбасы бізге табысты мемлекет құрып берді. Ол Қазақстанды әлемдегі озық елдердің қатарына қоса білді. Елбасы реформалары мемлекеттік орнықты даму жолына шығарды», — деді ҚР Президенті.
Қ.Тоқаев бүгінде бүгінде әлемде бәсекелестік пен қатар жаңа сын-қатерлер ушығып тұрғанын, жалпы бүкіл дүниежүзі дағдарысқа ұшырағандығын атап өтті. Әлемнің болашағы бұлыңғыр екендігіне назар аудартты.
«Сондықтан тоқтап қалуға мүлдем болмайды. Халқымыздың бірлігі, ұлтаралық келісім, күшті экономика әрі қарай алға басуымыздың негізі әрі кепілі», — деді Мемлекет басшысы.
Қазақстанның астанасы енді Нұр-Сұлтан қаласы деп аталады
Президент Қасым-Жомарт Тоқаев Қазақстан Республикасының астанасы – Астана қаласын Нұр-Сұлтан қаласы деп қайта атау туралы жарлыққа қол қойды, деп хабарлайды Ақорданың баспасөз қызметі.
«Қазақстан Республикасының əкімшілік-аумақтық құрылысы туралы» 1993 жылғы 8 желтоқсандағы Қазақстан Республикасы Заңының 9-бабына сəйкес қаулы етемін: Қазақстан Республикасының астанасы – Астана қаласы Қазақстан Республикасының астанасы – Нұр-Сұлтан қаласы деп қайта аталсын», — делінген хабарламада.
Жарлық алғашқы ресми жарияланған күнінен бастап қолданысқа енгізіледі.
Айта кетейік, елорданың атауын Нұр-Сұлтанға қайта атау бастамасын Қасым-Жомарт Тоқаев көтерген болатын. Ол мұндай ұсынысты Қазақстан халқына ант бере салысымен жасады. Парламент депутаттары идеяны қолдап, атауды өзгерту туралы шешім қабылдады.
Конституциялық кеңес Астананың атауын өзгерту мәселесі бойынша Конституцияға өзгерістер енгізуге оң қорытынды берді.
Қасым-Жомарт Тоқаев 2019 жылдың 20 наурызында Қазақстанның тұңғыш президенті Нұрсұлтан Назарбаев өкілеттігін тоқтатқаннан кейін республика президенті болды.

 

Нұрсұлтан Назарбаев жұмыс сапары аясында Абу-Дабидің тақ мұрагері, Біріккен Араб Әмірліктерінің Қарулы Күштері Жоғарғы Бас қолбасшысының орынбасары шейх Мұхаммед бен Заид Әл Наһаянмен кездесті.

Қазақстан Президенті дәстүрлі қонақжайлық көрсеткені үшін тақ мұрагеріне ризашылық білдіріп, Дүниежүзілік Арнайы Олимпиада ойындары Таяу Шығыс елдерінің ішінде Біріккен Араб Әмірліктерінде алғаш рет өтіп отырғанына тоқталды.

– Бұл маңызды спорт шарасы мүмкіндігі шектеулі спортшыларға өздерінің мықты рухы мен жеңіске деген ерік-жігерін танытуға жол ашады. Жарысқа Қазақстан командасы да қатысады. Елдеріңіздің басшылығы Қазақстан өткізетін халықаралық іс-шаралардың бәріне үнемі қатысып келеді. Сондықтан, сіздерге достық қолдау көрсету мақсатымен осы ойындардың салтанатты ашылу рәсіміне қатысуға келдім, – деді Мемлекет басшысы.

Нұрсұлтан Назарбаев өткен жыл екі ел арасындағы өзара тиімді ынтымақтастықты нығайту үшін жемісті болғанын атап өтті.

– Біздің жиі кездесулеріміз бен бауырластыққа және сенімге негізделген тығыз қарым-қатынастарымыз барлық салаларды жан-жақты дамытуға тың серпін беруде. Былтыр біз өзара сапар жасап, маңызды уағдаластықтарға қол жеткіздік. Солардың іске асырылу барысы толық көңілден шығады, – деді Қазақстан Президенті.

Мұхаммед бен Заид Әл Наһаян Біріккен Араб Әмірліктеріне шақыруын қабыл алғаны үшін Нұрсұлтан Назарбаевқа алғыс айтып, конфессияаралық келісім мен әлемде диалог орнату ісіндегі Қазақстанның рөліне ерекше тоқталды.

– Биыл біз еліміздің негізін қалаған тұлғаның 100 жылдығын салтанатты түрде атап өттік. Сіз шейх Заидті 25 жылдан астам уақыттан бері білесіз. Ол Сізді өте құрметтейтін және әлемдік деңгейдегі басшы ретінде танитын. Біз сіздерді үлгі тұтып, 2019 жылды – толеранттылық жылы деп жарияладық. Соның аясында Әмірліктер көпұлтты, мәдениетаралық және  дінаралық орталыққа айналуды көздейді. Осыған байланысты биылғы ақпан айында Рим Папасы Францисктің Біріккен Араб Әмірліктеріне тарихи сапары болды, – деді шейх Мұхаммед бен Заид Әл Наһаян.

Кездесу барысында тараптар халықаралық күн тәртібіндегі өзекті проблемаларды, туризм, цифрландыру, ғарыш, көлік, логистика және ауыл шаруашылығы салаларындағы ықпалдастықты талқылады. Сондай-ақ, өзара экономикалық ынтымақтастықты жандандыру, инвестиция тарту және Қазақстан тауарларын Біріккен Араб Әмірліктерінің нарығына шығару мақсатымен Үкіметаралық комиссияның және Іскерлік кеңестің әлеуетін арттыру мәселелері қаралды.