Қазақтың маңдайына біткен шолпан жұлдызы Хакім Абайға 175 жыл. Ұлы ақынды ұлықтау мақсатында «Абай оқулары» эстафетасының басталып, үлкен қарқынмен жалғасын тауып жатқаны жүрегі елім деп соққан әр бір қазақты қуантары анық.

«Абай лебі, Абай үні, Абай тынысы – заман тынысы, халық үні. Бүгін ол үн біздіңде үнге қосылып, жаңғырып, жаңа өріс алып тұр.» - деген Мұхтар Әуезовтың осы бір керемет сөзі осы эстафетаның әйтеуір бір боларын ақын жүрегі сезгендей.

«Абайды тану арқылы біз Қазақстанды танытамыз, қазақ халқын танытамыз, Абай әрқашан біздің ұлттық ұранымыз болуы тиіс.» - деп Тұңғыш Президентіміз Елбасы Нұрсұлтан Назарбаев айтқан сөзді мінекей бүгінде бүкіл ел болып іске асырудамыз.

Құрметті Қазығұрт ауданының жыр сүйер халқы, біз сіздерді осы игі шараға, яғни «Абай оқулары» эстафетасының жалғасын табуына белсенді түрде қатысуға шақырамыз! Сондай ақ, Қазығұрт аудандық Құлмат Өміралиев атындағы кітапхана қорында Абай Құнанбаевтың кітаптары мен Абай жайлы кітаптардың көп екенін айтқым келеді. Кітапханамызға келіп, кітап оқып көңіл көкжиектеріңізді кеңейтуге шақырамыз!

                175 жылдығына Ұлы Абайдың,

                Бір игі іс басталды деп санаймын.

                Гүл, періште, бүлдіршінім бастады,

                Ал, патшамыз игі істі қоштады.

                «Ұлы Абай оқулары» - деп аталған

                Эстафета қарқын алды елімде.

                Өз кезегі, қалыс қалмай қатардан,

                Үлесімді қосқым келді меніңде.

                Абайдың қара сөзі, өлеңдері оқылуда,

Тілек, өлең жолдар, арнаулар тоқылуда.

Ат салысып, әнші, ақын, бишілерде,

Қалыс қалмай күй жолдауда күйшілерде.

Келді міне Қазығұртқа киелі,

Халқымыз бұл шараға бас иеді.

Қабылдап алып, қуана бізде қолдадық,

Өлең оқып, ары қарай жолдадық.

                                                 Қазығұрт аудандық балалар

кітапханасының кітапханашысы

                           Кадирова Дана

               

 

                                                             Отбасылық құндылық

          

           

         Қазақстанның Тұңғыш Президенті Нұрсұлтан Әбішұлы Астанада әйелдердің бір мерекелік кездесуінде:

     – Біз ана болу – күрделі кәсіп дейміз. Бірақ, неге екені белгісіз, оны ешкім ешқашан үйретпейді. Ана болуды, отбасылық өмірді және балаларды тәрбиелеу ісін де үйрену керек. Сондықтан күшімізді жинап, экономикамызды дамытып алған шағымызда енді осыған кірісуіміз керек шығар. Жастар үшін отбасылық өмірдің қыр-сырын меңгеріп, оны одан әрі алып кету ең ауыр кезең. Әлемнің кейбір елдерінде отбасын құруға бел буған жастарды арнайы оқытатын тәжірибе де бар. Дәл осылай бізге де ана болу мен бала тәрбиелеуге жастарды үйрету керек, – деген еді.

Елбасының бұл сөзі Жастар жылы дегенде, тағы да ойға оралғаны. Бала тәрбиесі де, жастар тәрбиесі де бір-бірінен ажырамас ұғым. Негізінде бұрын бала тәрбиесі бір бөлек, жастар тәрбиесі бір бөлек тақырып боп көтеріліп жататын. Ал, қазір екеуін сабақтастыра байланыстырмай, мәні шықпайды. Егер жастар тәрбиесіне үңілсеңіз, оның бала кезде алған тәрбиесі алдыңыздан шығады. Жақсы тәрбие алған жастың өзін отбасы болуға, бала тәрбиесін жете түсінуге оқыту, үйрету керек. Әйтпесе, өзі қанша тәрбиелі болғанмен, өз перзентін дұрыс тәрбиелей алмауы да мүмкін.

Кеңес өкіметі кезінде бала тәрбиесі үшін ата-ана жауапкершілігі қатаң назарда еді. Перзентінің қателігі үшін ата-ана жауап беретін, тіпті, адамдардың өмірінің өзегі ғана емес, жүрегі саналған коммунистік партия қатарынан да шығарылып, болашағына балта шабылатын. Осындай қиын жағдайға ұрынбас үшін ата-аналар ұл-қыздарының тәрбиесіне баса мән беруге тырысатын. Ал, қазір социалистік режимнен табиғаты мүлдем басқа капиталистік дәуірге аяқ басқан кезеңде өмір сүріп жатырмыз. Оның үстіне егемендігімізді жариялаған уақытымыз бұрынғы Одақтас республикалар арасындағы экономикалық байланыстардың үзіліп, кәсіпорындар мен кеңшарлардың құлдырауымен тұспа-тұс келген еді. Өтпелі кезеңнің ауыртпалығы бала тәрбиесіне қатты әсер етті. Әйел біткен сөмке арқалап, ұзақ іс-сапарларға шығып кетті. Отбасына келгенмен, күні бойы тауарын өткіземін деп шаршап, шалдығып, ұл-қыздарының қалай өсіп жатқанына назар аударуға да шамасы келмейтін. Міне, сол кездегі ұл-қыздар өсіп жетіліп, отбасын құрып жатыр. Қыздар анасының, әжесінің, ұлдар әкесі мен атасының бір-біріне ғасырлар бойы дарып келе жатқан дәстүрлі тәрбиесін толықтай ала алмаған сияқты. Ата дәстүрін, ізгі қасиеттерді қазіргі жастардың бойына дарыта алатын аға буынның өкілдерін әлі де пайдалануымыз керек. Қазір қоғам психологтардың көмегіне жүгіне бастады. Ол да дұрыс шығар. Бірақ, бұрын психолог көмегіне жүгінбей-ақ, ата дәстүрді, қазақы қасиетті, иманды, ізгілікті ата-аналар перзенттеріне күштеусіз-ақ, өздерін дұрыс ұстаумен, мәдени болмысы мен келбетімен, іс-қимылымен, өнегесімен-ақ дәлелдеп жатты. «Ұяда не көрсең, ұшқанда соны ілерсің», – деп сол кезде баспасөз жиі жазып жатты.

Кеңес дәуірінде кітап оқу дәстүрі керемет еді. Адамдар байлығымен емес, кітапты көп оқып, зейінімен, зеректігімен ерекшеленіп тұрады. Ал, бүгін, уақыт басқа. Интернет, әлеуметтік желілердің дәуірі келді. Оның іші кіршіксіз дей алмайсың. Баладан бастап, қарияға дейін бәрі әлеуметтік желілерге байланып отырғаны. Мұның бәрі адамның алтын уақытын ұрлайды. Жасөспірімнің пайдалы іспен айналысуына қызығушылығын жоғалтады. Балабақшада ертегі, мектепте көркем әдебиет оқымаған балада парасатты сана қалыптасатынына илану қиын. Болашақта осындай тәрбиемен өскен азамат өз ұрпағына қандай тәлім беретінін де болжау оңай емес.

Бүгінгі ұрпақ ол – еліміздің болашағы. Біздің алға қойған мақсатымыз – қазіргі қоғам мұратына сай жан-жақты жарасымды тұлға өсіру. Сондықтан, перзенттерімізді күні-түні ғаламторға телміртіп қоймай, мағыналы іспен айналысуға үйрету керек. Ұрпағымызға дұрыс тәрбие бере алсақ, оның жан дүниесі де дұрыс қалыптасып жетіледі, яғни бойына жақсы қасиеттерді сіңіріп өседі. Бұл қасиеттердің бәрі адамның бойында бала кезінен бастап тұрақты қалыптаспақ. Жас жеткіншектің өмір сүруге құштарлығының оянуы жақсы мен жаманды, обал мен сауапты ажырата білуі өзін қоршаған ортасына, ата-анасына, құрбы-құрдастарына, олардың іс-әрекеттеріне және де басқа да қасиеттеріне байланысты.

Ал, енді ұстаздар қауымына келсек, білім ошақтарында мұғалімдер шәкірттерге білім мен қатар өнегелі тәрбиені дарытуда. Алайда, жас жеткіншек тәрбиесі өз отбасынан бастау алатынын ұмытпаған абзал. Балаға жас кезінде әсер ететін құбылыстар әр түрлі болғанмен, оларды тәрбиелеуші әрине, ата-ана. Бұл деген, ең басты тәлім ошағы – отбасы деген сөз. Яғни, отбасы ұрпақтың бойына рухани құндылықтарды қалыптастыратын мектеп десек те болғандай.

Жаңа мақаламызда бүгінгі қоғамның психологтарға жүгінуі туралы айтып өттік. Біздің айтарымыз, ауылыңызда дана болса, даналарға жүгініп отыру перзентіңіздің тұлғалық қасиетін қалыптастырар еді. «Жақсыдан шарапат» деген. Балаңыз жақсы адаммен араласса, тәлімін тыңдап өссе, жаман болмайды. Қазақтың иманға негізделген әдет-ғұрпы мен салт-дәстүріне жүгінсеңіз, әулетіңізде парасаттылықтың дәнін еккеніңіз.

Ал, бүгінгі жастар арасында ажырасудың көбейіп кеткені де осындай дәннің егілмегенінен, өңбегенінен.

Елбасы дұрыс айтады, Ана болуды, отбасылық өмірді және балаларды тәрбиелеу ісін де үйрену керек деп. Және жастар үшін отбасылық өмірдің қыр-сырын меңгеріп, оны одан әрі алып кету ең ауыр кезең дейді. Балғындарымызды даналардың тәрбиесіне бергенімізде, күрделі мәселелер туындамас еді деп ойлаймыз. Сондықтан, заңғар жазушымыз Мұхтар Әуезов айтпақшы, «Ел боламыз десек, бесігімізді түзейік!».

Күләйім МЕҢЛЕШ,

«Майбұлақ» жалпы орта мектебінің

бастауыш сынып мұғалімі.

 

Тұңғыш Призидентіміз Н.Назарбаевтың «Мәдени мұра» бағдарламасын іске асыру максатында Қазығұрт ауданындағы мектептерде білім алатын жастардың мәдени, рухани білімін дамыту, өлке тарихын, жәдігерлерді насихаттау, отанға деген ұлтжандылығын күшейту мақсатында аудандық музейде көшпелі көрме ұйымдастырды. Аудан орталығынан шалғайдағы мектептерге барып музей көрмесін, тарихын, білім алып жатқан жас буын жастарға ауданымыздың, киелі Қазығұрт тауының тарихын, салт-дәстүрлерімізді, ата-бабаларымыздың ерлігін, қолөнер шеберлерін бұйымдарын, ауданымыздан табылған баға жетпес құнды заттардың тарихын насихаттап, көшпелі көрме көрсеттік. Мектеп оқушылары және ұстаздар көптеген әсерлі мәліметтер алды. Аса құнды экспонаттарды өз көздерімен көріп, қолына ұстап көріп, риза болды.

Е.ДӘУЛЕТОВ,

музей әдәскері.

«АЙГӨЛЕК» ФЕСТИВАЛІ ӨТТІ

Жұма, 31 Мамыр 2019 00:00

 

Жуырда «Өнер» мектебінде Халықаралық балаларды қорғау күні аясында дәстүрлі «Айгөлек» балалар шығармашылығының аудандық фестивалі өтті.

         Бұған дейін фестиваль мектепке дейінгі ұйымдарда, жалпы білім беретін мектептердегі шағын орталықтар мен мектепалды дайындық сыныптарында ұйымдастырылып өтіп, жүлдегерлер мен жеңімпаздар аудандық іс-шараға жиналған болатын.

Аталмыш іс-шараға қатысушы жас дарындарға аудандық білім бөлімі басшысының орынбасары Алия Егізекова құттықтап, өнерлі өрендерге сәттілік тіледі.

Біздің «Шолпан» балабақшамыздың атынан «Жұлдыз» тобынының тәрбиеленушісі Нұрсейіт Ғайни Ердаулетқызы, тәрбиешілері – Илебаева Диана Фархатқызы мен Төлеубаева Айжан Мұрсалқызы қатысып, гимнастика, хореография өнерімен көпшіліктің көңілінен шығып, жүлделі І орынға ие болды. Осындай жетістікке жетуімізге меңгеруші Ногаева Саяра Алхарқызы жас бүлдіршіндердің өсіп, жетіліп биіктен көрінуіне жағдай жасап, балалардың қызығушылығын арттыруда десек жаңылыспаймыз.

            «Шолпан» балабақшасы аудан көлеміндегі іс-шараларда жақсы нәтиже көрсетіп келеді. Аудандық, облыстық байқауларда өнерлі бүлдіршіндеріміз мерейімізді өсіруде.

Салтанат ҚҰЛБЕКОВА,

«Шолпан» балабақшасының әдіскері.

Диана біздің мақтанышымыз!

Жұма, 31 Мамыр 2019 00:00

                         

Балабақша – баланың жүйелі түрде білім тәрбие алатын ең алғашқы ошағы. Балабақшаның балаға беретін тәлім-тәрбиесінің қаншалықты мықты болуы, сол балабақшада қызмет ететін педагогикалық ұжымға, нақтырақ айтар болсақ, ұстазға байланысты.

Ұстаз – киелі мамандық. Ол ертеңгі болашақты, болашақ иесін – ұлтын тәрбиелейді. Адам тәрбиелеу, оған ғылым негіздерінен мағлұмат беру, баланы өмір сүруге икемдеу, адами қылықтарды бойына дарыту – ол оңай шаруа емес. 
Тәрбиеші – суретші, әртіс, әдебиетші, ақылшы, дос және бала жанын бағамдар психолог. Осындай мамандықтың шынайы иесі, әріптестерінің арасында еңбекқорлығымен, жаңашылдығымен, ізденімпаздылығымен көзге түскен әріптестеріміздің бірі «Шолпан» балабақшасының тәрбиешісі – Илебаева Диана Фархатқызы. Диана Фархатқызы Л.Н. Гумилев атындағы Еуразия Ұлттық университетін «Мектепке дейінгі оқыту және тәрбиелеу» мамандығын «үздік» дипломмен бітіріп, 2011-жылы «Дипломмен ауылға» бағдарламасымен жұмысқа қабылданды.

Қиындығы мен қызығы, ауыртпалығы мен жауапкершілігі қатар жүретін осы еңбектің жолындағы педагогикалық ұстанымы – үнемі жаңалыққа ұмтылып, алдыңғы қатардан көріну және әр тәрбиеленушінің бойынан жылт еткен жақсылықты, талап пен талантты тауып, бұлақтың көзін ашу, биікке жетелеу, сондай ізденістер арқылы биік мақсаттарды орындауға ұмтылысы жоғары болды. Осындай талап-жігерінің арқасында аудандық, облыстық түрлі сайыстарда жүлделі орындар алып жүрген білікті маман. Өзі жетекшілік ететін топтағы балдырғандарға тәлімді тәрбие берумен қатар, бала санасында мектепке дейінгі білімнің негізін қалауда аянбай тер төгіп жүрген педагог бала жанын терең ұғына білетін, талапшыл, мәдениетті, кішіпейіл, ата-аналармен жақсы қарым-қатынас орната білген озат тәрбиеші-педагог.

Бауыр еті балаларының сүйікті тәрбиешісі бола білген Диана Фархатқызының шығар белестері әлі алда деп ойлаймын. Көрнекті тұлға Ахмет Байтұрсынұлы: «Балам дейтін ел болмаса, елім дейтін бала қайдан болсын», – деген екен. Балабақша тәрбиешілері осындай елім деп еңірейтін ұрпақты тәрбиелеуге тер төгуде.

Ақмарал БЕРДІҚҰЛОВА,

кәсіподақ төрайымы.

                                  

БАЛАУСА БИ ТОБЫНА – 18 ЖЫЛ

Жұма, 31 Мамыр 2019 00:00

 

           

Аудандық мәдениет сарайында «Балауса»би ансамблінің құрылғанына 18 жыл толуына және 2019-жыл – Жастар жылына орай «Би – әлемнің рухани елшісі» атты тақырыпта мерекелік есеп беру концерті өтті. «Балауса» би ансамблі ауданымыздың өнерге құмар кішкентай бүлдіршіндерінен, орта буындағы мектеп оқушыларынан қыздарды іріктеп құрылған. Ансамблді ұйымдастырудағы мақсат – болашақ жастардың, салауатты өмір сүруіне ықпал жасау, өнерге деген құлшыныстарын арттыру. Қиындықтарға қарамастан, көп жылдар бойы адам баласы өз саласын жетік меңгерсе, жұмысының жемісін көреді демекші, өнерді сүйген баланың өмірінің сүйкімді болуы әбден мүмкін. Осы бірнеше жылдар аралығында, «Балауса» би ансамблінің ару қыздары ауданымыздың намысын облыста, республикада қорғап, облыстық, республикалық байқаулардың бас жүлдесін бірнеше рет қанжығасына байлады.

Болашақ еліміздің өркендеуіне, жастардың қосар үлесі мол деп сенемін. «Тәрбие тал бесіктен басталады» деп ұғынған ата бабаларымыздың ұлттық болмысын сақтап, биші қыздар ұлттық дәстүрімізді насихаттап, ерекше мән беріп келеді.

Мерекелік концерттің жоғары дәрежеде өтуіне ұйытқы болған «Болашақ» мектеп-гимназиясының директоры Нұрқұл Жанатқа, аудандық мәдениет үйінің директоры Тұрабеков Қалыбекке, аудандық өнер мектебінің директоры Темірбаев Бауыржанға ата-аналар мен «Балауса» би ансамблінің жетекшісі Оразова Гүлнара Әріпқызы алғысын білдірді.

Өнер жолындағы қанаттарыңыз талмасын деген ниетпен «Балауса» би ансамблінің ұжымына зор денсаулық, шығармашылық табыс тілейміз!

А.ҚАЛБОТАЕВ,

аудандық "Жастар ресрустық орталығы" жанындағы "Әлеуметтік-психологиялық сүйемелдеу қызметі" секторының меңгерушісі.

Еркін күрес

 

        

Жуырда «Жеңіс» спорт кешенінде «Жастар ресурстық орталығының» ұйымдастыруымен "Жалындайды Қазығұрттың жастары" атты еркін күрестен жарыс өтті.

Жастар жылына орай өткізілген жарысқа әр ауыл округтерінен түрлі салмақ дәрежесіндегі жасөспірімдер мен палуандар бақ сынасты. Жарысты өткізудегі мақсат – еркін күресті жастар арасында насихаттау және салауатты өмір салтын қалыптастыру.

   Көрермендер арасында еркін күресті дамытуға ат салысып жүрген азаматтар да болды. Олар жас өрендерімізге сәттілік тіледі. Жарыс жеңімпаздары мен жүлдегерлері алғыс хатпен және сыйлықтармен марапатталды. 

Сағи ҚЫПШАҚБАЕВ,

«Жастар ресурстық орталығының

инспекторы.

Бұл мереке славян жазуы мен мәдениетінің күні ретінде әр жылы 24-мамырда аталып өтіледі. Көзі қарақты оқырман славян харпін бір ізге келтірген ағайынды Кирилл мен Мефодияның еңбектерін жақсы біледі.
Осы «Матрешка» күні аталған мәдени мереке Ресей елшілігі мен Түркістан мәдени орталығының ұйымдастыруымен Түркістан қаласында өтті.
Іс-шара жас өнер шеберлерінің, өнертапқыштардың, ұлттық киім үлгілерінің, аспаздардың, ұлттық дәстүрлерді дәріптеудің көріністерімен ұштастырылды.
Оған Қ.Сәтбаев атындағы мектеп-лицейінің шәкірттері де қатысты.
Байқау нәтижесінде А.Гарифов, А.Шаповалова, А.Хасанов, Н.Тұрғанбек, С.Асқар, Г.Дауренбек, Д.Борзенко, А.Ардаққызы, Р.Махсудова жеңімпаз атанып, дипломмен марапатталды.
Өнерлі оқушыларды тәрбиелеген, жол көрсеткен ұстаздары Е.А.Лепешкина, Р.Г.Хусайынова, Н.Р.Құрбаналиеваға ұйымдастырушылар алғыс айтып, аудан әкімдігіне ризашылықтарын білдірді.

Ғ.ҚОЙЛЫБАЕВА.

Ибалы келін, тәрбиелі ұрпақ

Жұма, 12 Сәуір 2019 00:00

Отбасылық құндылық

 

   «Ел болам десең,бесігінді түзе», – деп М.Әуезов өткен ғасырда айтса да, афоризм ретінде қалыптасқан ұлы сөзді ұлағат тұтудан шаршамаймыз.

   «Ел болашағы – жастар» демекші елдің болашағын ұлықтау саясатын ұстана келе, Қаржан тауынын баурайында орналасқан «Айсұлтан» бөбекжай-балабақшасында. «Ибалы келін – тәрбиелі ұрпақ» атты келіндер байқауы өтті.

Байқауымыз Елбасының «Болашаққа бағдар: рухани жаңғыру» бағдарламасы аясында ұйымдастырылды. Алғашқы бөлімінде алтын құрсақты аналарымыз «Бесік салу», «Тұсау кесу», секілді салт-дәстүрімізді дәріптеп көрсетті.

Бақшамыздағы «Айгөлек» тобынан – Ұлжан Сманова, «Сұңқар» тобынан – Перизат Әбдіхаймова, «Балапан» тобынан – Гүлжайна Нұрмырзаева, «Күншуақ» тобынан – Жамила Жүнісова, «Балауса» тобынан – Жансая Қаратай атты келіндеріміз қатысты.

   «Саусақ бірікпей, ине ілікпейді», – дегендей келіндеріміз ауызбіршілікпен тамаша өнер көрсетті.

   Салт-дәстүр, әдеп ғұрыпқа байланысты сұрақтарға дұрыс, тапқырлықпен жауап беріп, өздерінін ибалы, инабатты келін екендіктерін дәлелдей түсті.

«Атадан ұл туса игі,

Ата жолын қуса игі,

Атадан қалған кәсіпті

Өзі біліп тұрса игі» – демекші осындай игі істер арқылы, кішкентай бүлдіршіндерімізге кішкентай болса да, ұлттық тәрбие бере аламыз деген ойдамыз.          

   Салт-дәстүрдің қаймағын бұзбай болашақ ұрпаққа жеткізу біздің міндетіміз.

                                                                            Тағайкүл ЖҰҚАБАЕВА,

Алтынтөбе ауылы.

ӘЖЕЛЕР – АСЫЛ ҚАЗЫНА

Сәрсенбі, 20 Наурыз 2019 00:00

Ізет

 

Қазығұрт аудандық ардагерлер кеңесінің жанынан 2013-жылы құрылған әжелер алқасының мүшелерін 8-наурыз Халықаралық Әйелдер мерекесімен ауданымыздың төбе биі, соғыс және еңбек ардагері Иса Телікбай, аудандық ішкі саясат бөлімінің басшысы Абай Серкебаев, аудандық қоғамдық кеңесінің төрағасы Мұхтар Момынов және аудандық ардагерлер кеңесінің төрағасы Аманбай Омаров құттықтады. Гүл дестелерін ұсынды.

Егерде көргенді әжелер жас ұрпақты ата-бабадан келе жатқан ұлттық салт-дәстүрмен, әдет-ғұрыппен тәрбиелеуге ден қойса, онда олар – халқымыздың шын мәніндегі сарқылмайтын асыл қазынасындай болады. Ауданымыздағы Лескүл Жанысбекова басқаратын әжелер алқасының мүшелері өзіндік өнегелерімен, тағылымдарымен ерекшеленіп тұрады. Төбе биіміз олардың осындай үлгілерін айта келіп, ақ батасын берді. А.Серкебаев Қалдыбек Құрманәлінің бастамасымен өткен жылы жарық көрген «Шәмші Қалдаяқов» кітабын сый-сияпат ретінде ұсынды.

Аналарымыздың анасы – әжелерді қалай құрметтесек те жарасады. Бүгінде 13 алқа мүшесі бар әжелеріміздің құшақтары гүлге толып, айналасына нұр шуағын, мейірімін төгіп, жүздері бал-бұл жанғанын көргенде, осындай қазына қарттарымызды қадір тұтып, бойымызды мақтаныш сезімі кернеп кеткендей бір тәтті сезім шым-шым етті. Ниет еткен мақсаттарыңызға жетіп, кейінгі ұрпақтарға үлгі-өнеге болып жүре беріңіздер, әжелер!

Құралбек ЖОЛДАСҰЛЫ.